Pa la celebración d'estiañu, ofrécense muitas actividades diferientes, todas, eso sí, pensadas pa satisfacer las demandas d'un espectru ampliu de la población.
Abren la sumana dúas exposiciones, una de tipu infantil ¿A qué sabe la lluna? ya outra más enfocada al públicu adultu, baxo'l títulu Na punta la llingua, que recói una serie de viñetas de reivindicación l.lingüística del artista gráficu cangués Neto.
Estas exposiciones poderán visitase na Casa la Cultura "Palaciu d'Oumaña" a partir del día 22 de mayu ya hasta'l 5 de xunu. No propiu espaciu expositivu, amás de disfrutar d'estas muestras gráficas, haberá un sitiu habilitáu pa citas a ciegas cona nuesa literatura...
El martes, pola súa parte, celébrase la III Xunta d'escolinas ya escolinos de Cangas nuna xornada onde tolos centros educativos públicos del conceyu poderán disfrutar d'una obra de teatru, Yérase que se yera, de la Compañía d'Olga Cuervo; amás, de la entrega de premios del IX Concursu de cuentos pa nenas ya nenos de Cangas "Otilio Álvarez Rodríguez", la visita de las exposiciones ya dalguna sorpresa más.
El miércoles será'l turnu del públicu familiar, que disfrutará no Teatru Toreno de la obra Un arreglu inesperáu, a cargu del grupu de teatru amateur "La Páxara Pinta".
El xueves lo que cambiará será l'escenariu, que se desplazará a la Sala d'Actos del IES de Cangas del Narcea, onde a las 9:15 s'ofrecerá una charla sobre la experiencia de voluntariáu de l'asociación "Una chispa en Ritsona". Esta conferencia complementaráse con una serie de fotografías que retratan lo vivío polas personas qu'integran l'asociación ya que s'expondrá durante tola sumana no propiu centru educativu.
El vienres yá se cerrará esta celebración de las nuesas l.letras con un conciertu musical del grupu infantil del momentu, Pop Piquiñín (Petit Pop), abiertu a tola ciudadanía de Cangas ya la redolada.
La conceyala de Cultura, Carmen Riesco, asegura qu'esti tipu de programas son fundamentales a la hora de dignificar ya promocionar el nuesu patrimoniu inmaterial más importante, la l.lingua asturiana, ya comprométese a siguir trabayando pola súa normalización social en Cangas.