Ayuntamiento Cangas del Narcea 

Hai que destacar ente todas estas manifestaciones artísticas el Monesteriu de S. Xuan Bautista de Courias, de fundación benedictina no S. XI, que ta a 2 km. de la vil.la de Cangas del Narcea ya ía un conxuntu arquitectónicu d'influencia herreriana, el más importante de todu l'occidente asturianu ya unu de los más importantes d'Asturias. Foi fundáu pol Conde D. Piñolo ya la súa muyer, Aldonza, de feitu, tovía conserva dalgunos elementos d'esta primer construcción. La ilesia, d'estilu neoclásicu, feíxose a principios del s. XVI, ya tien retablos del s. XVII ya XVIII. El sou pisu ocupa 8.000 m. ya tien dous claustros. Todu'l conxuntu yá impresionante, igual que la gran estatua de S. Xuan Bautista del s. XVII. En 1763 un incendiu estrópialu algo  ya, cumo resultáu de los arreglos, qu'acabano en 1808, queda tal cumo lu conocemos güei. Dientro hai que destacar el retablu mayor d'estilu barrocu, de 1680, tamién el cristu románicu del s.XII, conocíu cumo'l Cristu de La Cantonada, que yá'l meyor exemplu barrocu d'Asturias. Outru de los sous atractivos yá'l gran claustru con arquería de mediu puntu debaxo la balconada de los pisos d'arriba.

La Basílica de Sta. María Madalena, Monumentu Históricu Artísticu declaráu, yía un gran exemplu de l'arquitectura clasicista barroca ya, cumo tal, tien un bon conxuntu de retablos barrocos (s. XVII-XVIII), destacando'l mayor (1643). Por fuera la basílica tien una fachada guapa, sin demasiáu rebelicoque, con un xuegu de valúmenes domináu por un gran cruceiru. Los planos d'esta obra son de Bartolomé Fernández Lechuga, maestru mayor de L'Alhambra.

La Capilla d'El Carme (Entrambasauguas), no barriu del mesmu nome. Esta capilla yá una construcción barroca  del s. XVIII, na que se guarda a la patrona de la vil.la, que destaca pola súa rara figura ya por tar nunu de los requeixos más vieyos ya guapos de la vil.la de Cangas.  

El Santuariu de Nuesa Señora d'El Acebu (S. XVI) ta cerca la vil.la ya dende él vese'l val.le'l Narcea ya la zona de Sierra. Esti templu yá un conocíu centru de pilegrinación mariana, del que se cuntan muitos milagros, ya, por eso, a él vei muita xente de la zona. Nesta zona hai amás un aria recreativa ande poder comer ya descansar viendo un paisaxe guapu ande los haba. A 3 km del santuariu, en L.linares, ta la Ilesia de Santa María Madalena, que tien dientro una taya del s. XIII.  

Repartidas pol conceyu, en ilesias pequenas de los pueblos, hai muitas outras muestras d'arte románicu ya góticu, destacan la Ilesia de San Pedru en Culiema, d'estilu románicu ya con tayas medievales bien guapas; la Ilesia de San Mamés en Tubongu, románica con dalgunos arreglos de despuéis; la Ilesia de Carceda con pinturas murales, retablos góticos ya imáxenes románicas; la Ilesia Parroquial de Santa María de L.lumés, d'estilu románicu cangués, ya, nun pueblu d'a la vera, L'Ardalí, el Palaciu de los Queipo Llano; más p'acul.ló, en Xedré,  la Ilesia de Santa María,  d'estructura románica na que se conservan dalgunas tayas medievales: un calvariu ya dúas figuras d'apóstoles, nesti l.lugar tamién cuntan cona casona blasonada de López del Campillo; ya la Ilesia de Santa María de Carbachu, de nave única ya capilla semicircular con ventana gótica, aiquí hai amás un interesante palaciu d'orixe medieval reconstruíu no s. XVI.

L'haber muita nobleza de carácter rural ya que consiguíu una gran importancia  ya poder na Edá Moderna explica'l bon númaru de palacios de los sieglos XVI ya XVII conos que tovía cuntamos.  No núcleu de la vil.la destacan: El Palaciu d'Oumaña (s.XVI), asitiáu a la vera la basílica, d'estilu renacentista con influencias góticas, mui reformáu, pero tovía conservando dalgunos elementos orixinales, cumo la puerta principal n'arcu de mediu puntu ya dúas ventanas. El  Palaciu de Peñalba (s. XVIII), asitiáu na calle Mayor ya declaráu Monumentu Históricu Artísticu nel que se puede ver un bon escudu que corona'l cuerpu central de la fachada. El Palaciu de los Condes de Toreno (1701), Monumentu Históricu Artísticu, sede de la Casa Conceyu ya tamién de la Casa Cultura yía un edificiu importante d'estilu barrocu, nel qu'a los dous l.laos de la fachada vense simétricas dúas torres blasonadas, nas qu'aparecen los escudos familiares. El patiu interior tien alredor columnas octogonales que tienen por un gran cordor de madera.   No restu del conceyu, merez la pena visitar: el Palaciu de los Sierra en L.lamas del Mouru, que tien tres torres, dúas cuadradas, na fachada, ya outra na parte d'atrás, no lateral izquierdu, adosada a la capilla; el Palaciu de los Queipo de Llano en San Pedru d'Arbas, (s. XVIII) nel que destaca el gran escudu de la familia; La Casona (s. XIX), en Bisuyu, casa ande nacíu Alejandro Casona; ya la Ilesia de San Martín ya'l pueblu de Xinestosu, centru de producción quesera ande se conserva la Ilesia de San Pedru,  dous núcleos que merez la pena ver por todo lo que conservan del sou carácter tradicional.