XIII SUMANA DE LAS L.LETRAS ASTURIANAS

XIII SUMANA DE LAS L.LETRAS ASTURIANAS

Dende esti vienres 13 ya hasta'l sábadu qu'entra, día 21 de mayu, vamos tar celebrando la nuesa l.lingua ya la nuesa cultura. Empicipiamos con una campaña sobre movilidá sostenible deseñada pol alumnáu del IES ya acabamos con una gran informante ya meyor persona, María L'Acebu. Futuru, pasáu ya presente del nuesu pueblu.

 El vienres 13 inauguramos cona xente más nueva nuna xornada escolar cicloturista protagonizada pol propiu alumnáu del IES, que, amás de movese sosteniblemente, preocupóuse del deseñu, los eslóganes ya la pegatina d'esta campaña de normalización que rematóu Signum.

El l.lunes 16 retomamos la celebración outra vuelta cona inauguración de la exposición d'Ediciones Pata Negra dedicada al nuesu símbolu arquitectónicu por excelencia, l'horriu.

El martes 17 ya'l xueves 19 pola mañena tán dedicaos al públicu escolar, no primer casu al alumnáu de Primaria ya no segundu al alumnáu de Secundaria. Las dúas citas inclúin obras teatrales, la primera yía Grana de cardamomu, d'El Callejón del Gato, ya la segunda, La reina de la guapura de Leenane, premiu Nel Amaro de Teatro na edición última convocada pola Dirección Xeneral de Política Llingüística. Esta obra ta interpretada pola compañía profesional asturiana Nun Tris.

El martes 17, amás, a las 19:00 horas, inaugura'l sou espaciu expositivu permanente na Casa la Cultura “Palaciu d'Oumaña” Lo Nueso, con muitos elementos representativos de la cultura canguesa, dalgunos antiguos enforma.

El miércoles 18, a las 20:00 horas, Lo Nueso repite protagonismu, nesti casu, no Teatru Toreno ya acompañadas por Javi Tejedor no espectáculu «Los nuesos sones», dedicáu n'exclusiva a esta pieza fundamental del folclore cangués.

El vienres 19, a las 20:00 horas tamién, visítanos Calea, que, amás de nesta xornada, colabora cona Rede de Normalización Llingüística nos Conceyos na campaña «Al Son del Cantar», pa la que grabóu un tema escritu ya compuestu pol alumnáu del IES de Cangas.

El sábadu 21, a partir de las 11:00 la mañena, ciarramos por tolo alto nuna xornada festiva dedicada a una persona emblemática del nuesu conceyu,  María L'Acebu ou María la Platera ou María'i Fonceca ou María'l Bar ou... todas esas Marías que representa una persona única cono potencial infinitu d'un cientu. Una muyer que promueve ya dignifica cumo poucas personas pueden la nuesa l.lingua ya la nuesa cultura milenarias.  Nesti actu, cargáu de simbolismu, hamos dar las gracias a tola xente que s'implicóu desinteresadamente, empicipiando pol ATOAM (Archivu de la Tradición Oral d'Ambás), Xeitu, El Bail.le, Lo Nueso, la Sección Tradicional de la Escuela de Música del Conceyu, Manu ya Naciu'i Riguilón ya, por supuesto, la súa familia. Hamos dar las gracias a toda xente que nos acompañóu no proxectu, pero, sobremanera, a María: ¡Muitas gracias, María, por ser ya tar!