Estas en:

Serviciu de Normalización L.lingüística

«No sabríem com imaginar un món sense paraules: un univers emmudit. El mar sense que ningú digués mar; els núvols privats de les paraules gris, blanc i brillant, o de les expressions amb què desitgem la pluja necessària; les criatures que van creixent cap a un món complex òrfenes dels mots dànim; els amants sense paraules d'amor... Cal, doncs, tenir cura de les paraules, salvar-les i conservar-les, perquè no tornin a la foscor i al silenci.»

 

«Nun sabríamos cúmo imaxinar un mundu sin palabras: un universu mudu. El mar sin que naide dixera mar; las nubes privadas de las palabras gris, blancu, l.luciu, ou de las expresiones con que deseamos l'augua necesaria; las criaturas que van creciendo nun mundu complexu güerfanas de la mezcla'i las palabras; los amantes sin palabras d'amor Fai falta, por eso, mirar polas palabras, salvalas ya conservalas, pa que nun volvan a la escuridá ya'l silenciu.»

Jesús Tusón Valls (Catedráticu de Filoloxía de la Universitat de Barcelona)

¿QUÉ SOMOS?

El Serviciu de Normalización L.lingüística del Conceyu'i Cangas yía l'organismu encargáu de garantizar l'usu del asturl.lionés cumo l.lingua vehicular en cualquier tipu de comunicación pública ou privada ente las alministraciones públicas del Conceyu ya la súa ciudadanía, na mayor parte los casos falante d'esti idioma; ya, tamién, de promover el sou usu ente distintos sectores del conceyu: hostelería, comerciu, educación... porque, a la fin, esta yía la única midida que puede garantizar la pervivencia del nuesu patrimoniu, la súa presencia cumo forma de comunicación viva ya plena.

¿QUÉ FEMOS?

Dalgunos de los puntos fundamentales dientro de las responsabilidades del Serviciu de Normalización L.lingüística son:

  • Ser parte activa del procesu de normalización toponímica, dar a conocer la nuesa toponimia ya garantizar ente la xente'l sou usu, porque, a la fin, esto siempre foi lo que se dixo, anque nun se respetara hasta'l momentu, ya yía lo tradicional, lo auténtico; pa faelo, vamos yir renovando la siñalética hasta garantizar la súa presencia en tódolos carteles de carreteras, mapas ya documentos públicos de cualquier clas.
  • Traducir tódolos documentos públicos ya privaos con repercusión no Conceyu ya garantizar el bilingüismu equilibráu na alministración pública, tal ya cumo vien estipulao nas ordenanzas aprobadas en Plenu por esti Conceyu.
  • Garantizar la presencia institucional del asturianu no Conceyu, dende retulación hasta publicidá... tamién, tal ya cumo vien estipulao nas Ordenanzas aprobadas en Plenu por esti Conceyu.
  • Faer del asturianu un componente tresversal dientro de los distintos aspectos que xestiona un Conceyu, atendiendo a lo estipulao polas Ordenanzas aprobadas en Plenu por esti Conceyu.
  • Faer campañas ente distintos sectores de la población pa promover l'usu del asturianu ente los mesmos: empresas hosteleras, comerciantes, asociaciones... ya ciudadanía en xeneral.
  • Informar ya tramitar las subvenciones qu'en relación al usu del asturianu saca cada añu la Conseyería de Cultura.
  • Dignificar l'usu del asturianu hasta acabar cona diglosia.

Esti yía a grandes rasgos el faer d'un serviciu de normalización l.lingüística, l'ambición yía grande ya l'obxectivu lexítimu, anque non siempre fácil, poner al asturianu cumo l.lingua de la población asturiana na situación que merez, la que lu equipara cumo l.lingua d'usu al español (cono que convive n'Asturias) ya non la que lu fai subsidiariu del mesmu, porque son idiomas de la mesma valía, cono que nun tien demasiáu sentíu l'arrequeixamientu, la marxinación ya la persecución que sufre'l primeiru. La l.lingua asturiana yía'l bien cultural más importante que tenemos ya la súa perda sería un mal irreparable.

¿ÓNDE TAMOS?

Cualquier asociación ou particular que quiera puede ponese en contactu cono serviciu, bien chamando por teléfonu, bien por corréu electrónicu ou bien en persona, pasando pola Casa la Cultura "Palaciu d'Oumaña"

  • Casa la Cultura "Palaciu d'Oumaña" (éntrase pola C/ Chapinas)
  • La Plaza La Oliva, s/n
  • 33800 Cangas del Narcea (Asturias)

Contactu

  •  Teléfonu: 985 812 617
  • Corréu electrónicu:  l.linguacangas@ayto-cnarcea.es

Horariu

De l.lunes a vienres:

  • De 8:00 a 15:00 h.