XI CONCURSU'I CUENTOS CURTIOS "OTILIO ÁLVAREZ RODRÍGUEZ"

XI CONCURSU'I CUENTOS CURTIOS "OTILIO ÁLVAREZ RODRÍGUEZ"

Esti concursu instauróuse no 2009, espuéis de la perda irreparable del docente Otilio Álvarez Rodríguez, director de la escuela pública de Bruel.les, activista de los drechos lingüísticos ya persona mui apreciada na zona.

Nesta edición, poderán presentase escolinas ya escolinos matriculaos nos centros educativos públicos de Cangas que cursen terceiru, cuartu, quintu ou sestu de Primaria.

Polo demás, las bases mantienen las condiciones de las ediciones anteriores, las obras han presentase manuscritas na variedá occidental de la l.lingua ou na estándar ya, ente tolas presentadas, premiaránse las 3 meyores.

En palabras de Carmen Riesco, conceyala de Cultura del Conceyu Cangas, con esti tipu d'iniciativas, pretende homenaxease la figura d'un docente modelu ya animar al ámbitu docente a siguir la súa andadura no qu'a  promoción ya dignificación de la nuesa l.lingua se refier.

 

BASES

  • Pueden participar tódalas personas matriculadas nos cursos de 3u, 4u, 5u ou 6u de Primaria de dalgunu de los centros educativos de Cangas del Narcea.
  • Cada participante puede presentar una obra namái,  na variante occidental de la l.lingua ou na estándar.
  • Han  premiase aquel.las obras inéditas qu'a xuiciu del xuráu sean d'un valir literariu mayor.
  • La temática ía l.libre ya'l relatu ha tener d'extensión una fuea cumo mínimo ya cinco fueas cumo máximo.
  • La  presentación ha fadese en DIN A4.
  • La obra vei presentase manuscrita.
  • Las obras nun van volvese a las personas participantes.
  • Las obras presentadas van ser expuestas ya usadas pol Conceyu en campañas de normalización social.
  • Las obras premiadas pueden publicase na páxina web del Conceyu de Cangas del Narcea ya/ou na páxina de Facebook del Serviciu de Normalización L.lingüística.
  • Ha  premiase con trés lotes de l.libros ya material escolar a las ya los ganadoras ya ganadores del concursu.
  • Los trabayos han presentase presencialmente  no Serviciu de  Normalización  l.lingüística (Casa la Cultura "Palaciu d'Oumaña", La Plaza la Oliva, s/n, 33800, Cangas de Narcea) ou por corréu certificáu na mesma dirección primeiro del 10 de mayu del 2019. Pídese al personal docente, qu'a ser posible, mande las obras participantes nun sobre por escuela, nél,  meteráse cadaguna de las obras presentadas firmada cono pseudónimu del autor/a ya, aparte,  outru sobre cerráu  con una fuea ande se detallen los datos riales del alumnáu que se presenta al concursu.
  • El xuráu vei tar formáu por varias personas con cargos públicos no Conceyu de Cangas del Narcea: Carmen Riesco Combarro, conceyala d'Educación ya Cultura del Conceyu Cangas; Rosa Caballero Martínez, técnica de la Oficina d'Información a la Mocedá; Mónica Rodríguez Riesgo, técnica del Serviciu de Normalización L.lingüística del Conceyu Cangas; Elena Martínez Martínez, técnica del Centru de Dinamización Tecnolóxica del Conceyu ya Noelia Rodríguez Menéndez, coordinadora del Aria de Cultura del Conceyu.
  • El resultáu del xuráu ha comunicase a las personas interesadas por carta ya/ou teléfonu días antias de los actos previstos.
  • Los premios otorgaránse a las personas premiadas nun actu públicu organizáu pol Serviciu de Normalización l.lingüística con motivu de la celebración de la Sumana de las L.letras Asturianas.
  • Participar nesta convocatoria supón l'aceptación de las bases.