Estas en:

Visor de contenido web Visor de contenido web

XVI CONCURSU DE CUENTOS CURTIOS DEL CONCEYU CANGAS

Reguníu'l 20 del mes muertu del 2018 el xuráu del XVI Concursu de cuentos curtios del conceyu Cangas, formáu polos escritores Elías Veiga ya Laura Marcos, la filóloga Marta López ya la responsable del Serviciu de Normalización L.lingüística Mónica Rodríguez, decidíuse conceder el primer premiu n'asturianu occidental al cuentu El picadoriu, de Raquel F. Menéndez ya Marcos Martínez Fernández ya'l primer premiu n'asturianu normativu al cuentu El frutu de la pasión, d'Armando Gutiérrez Rodríguez.

Los dous cuentos tán escritos cona corrección ya l'arte que da la experiencia literaria ya constrúin historias próximas al nuesu propiu contextu bien fundamentadas ya desenvolvidas.

Los dous van tar, amás, disponibles pa la súa lectura ya disfrute na páxina de Facebook del Serviciu de Normalización L.lingüística.

Raquel F. Menéndez ya Marcos Martínez Fernández, que presentanon un cuentu en coautoría, son occidentales de Salas ya Tinéu, respectivamente; polo que conocen bien la variedá l.lingüística que nos yá propia. Amás, los dous son filólogos ya participantes activos no devenir cultural d'esta comunidá. La primera con una obra literia más que reconocida, particularmente nel ámbitu de la poesía, onde destaca la súa obra El llibru póstumu de Sherezade, premiu Nené Losada Rico del 2016, reconocíu, amás, cumo meyor l.libru del añu 2017 pola Tertulia Literaria Malory ya'l segundu con una obra gráfica, que condensa maestría ya simbolismu, recoyida baxo la marca Indelendo.

Armando Gutiérrez Rodríguez, pola súa parte, yá un l.lionés que cambióu'l carbón pola pluma, dando cuenta d'un xeitu excepcional pa las palabras. Tal ya asina, qu'esti mesmu añu ganóu tamién outru  certame bien conocíu, el XV Concursu de microrrelatos mineros de la Fundación Juan Muñiz Zapico.

La conceyala de Cultura, Carmen Riesco Combarro, felicita a las personas ganadoras pol arte col qu'escriben ya arriquecen las nuesas l.letras ya anima a tolas demás personas participantes a siguir contribuyendo cona súa pasión a la dignificación de la nuesa l.lingua.