El Conceyu de Cangas del Narcea, al traviés de l'Axencia d'Igualdá d'Oportunidades, conmemora'l 8 de marzu, Día Internacional de las Muyeres, organizando actividades que permitan avanzar hacia una  igualdá rial durante tol mes.

El 8 de marzu, epicentru de las movilizaciones, el Conceyu sumaráse a los paros parciales ya a la concentración feminista, que se fairá a las 12:00 horas delantre la Casa Conceyu, n'El Mercáu, ya irá acompañada de la lectura d'un manifiestu d'apoyu a las movilizaciones feministas.

El 11 de marzu, extendiendo ya afondando nas reivindicaciones del 8 M, fairáse una mesa de debate nel Auditoriu de la Casa Cultura ¿Palaciu d'Oumaña¿ a las 17:00 horas. Durante l'actu, que presentarán l'alcalde ya la conceyala de la Muyer del Conceyu Cangas, haberá un par de charlas que darán pasu al debate, la primera a cargu de la socióloga ya docente experta en xéneru, Ángeles Martínez García, que tratará cuestiones cumo'l feminismu rural ou la violencia de xéneru ya la segunda, a cargu de la secretaria d'Igualdá d'UGT Asturias, Carmen Escandón García, que se centrará más nas cuestiones d'índole laboral.

Dalgunos días espuéis, concretamente los días 20 ya 21 de marzu, l'Axencia d'Igualdá coordinará l'actividá siguiente prevista, las II Xornadas de coeducación: Deprendiendo a educar n'igualdá, que s'articulan cumo un foru de deprendimientu activu onde profesoráu, familias ya personal técnicu de l'alministración comparte las súas inquietudes en materia de coeducación. Estiañu, las xornadas incluirán una ponencia de la profesora de Lengua especialista en coeducación Marián Moreno Llaneza, un taller prácticu sobre'l rol de la muyer no mundu del arte a cargu de Patricia Pérez Ordoñez, licenciada n'Historia del Arte; una ponencia sobre cúmo evitar la violencia dende l'ámbitu educativu, a cargu de María Campomanes Fernández, profesora de Servicios a la Comunidá ya un taller prácticu de coeducación pal profesoráu, a cargu de la consultoría Magenta.

Sumando a todas estas actividades, durante todu esti cuatrimestre, l'axente d'Igualdá, Belén Fernández, impartirá talleres polos centros escolares de la zona.

La conceyala de la Muyer, Carmen López, reafirma'l sou compromisu cona l.luita hacia la igualdá rial ya fai sou'l lema de la xornada: n'igualdá nin un pasu p'atrás.

Imágenes