Cangas del Narcea, 15 d'abril de 2021. El Conceyu de Cangas del Narcea conmemora'l sábadu 17 d'abril el Día Européu de la Información a la Mocedá. Vei fadelo cona emisión d'un programa de televisión "Más de 30 anos informando a la mocedá", que vei emitise a las 12 horas del sábadu por TV Narcea ya que fui graváu na Casa la Cultura  "Palaciu d'Oumaña". Nél, participanon las personas responsables de las oficias de Somiedu, Grau, Tinéu ya Cangas, que fui la oficina qu'impulsóu esta iniciativa, pa fader un repasu de la evolución de la información dende que s'implantóu'l serviciu  no conceyu no mes de los santos de 1989. Durante'l programa, tamién vei dase a conecer la importancia que supuxo pa la mocedá  de las zonas diferientes la implantación d'estos servicios. Amás, las personas protagonistas van falar de los cambios que l'andancia obligóu a impulsar no ámbitu de referencia ya cúmo s'adaptanon a la situación.

"El programa ía una oportunidá pa emponderar el trabayu que se fai dende estas oficinas", recalcóu la conceyala d'Educación, Mocedá ya Consumu de Cangas, Esther Fernández Somiedo, qu'animóu a las vecinas ya vecinos, especialmente a las más nuevas ya nuevos, a ver el programa al traviés de las redes sociales de Radio Narcea TV. La Oficina Moza "ía un serviciu mui valoráu ya qu'ayudóu a muitas rapazas ya rapaces dende qu'abríu", recordóu Fernández Somiedo, qu'aprovechóu p'animar a la rapazada a usar esti serviciu que tienen a disposición. 

Cada 17 d'abril, las mozas ya los mozos ya los servicios que los informan celebran el Día Européu de la Información a la Mocedá. Esti día, que fui declaráu en 1983 pola Axencia Europea d'Información ya Asesoramientu a la Mocedá (ERYCA) ya'l Institutu de la Mocedá d'España (INJUVE) da la oportunidá de reconecer las aportaciones de los servicios d'información, especialmente en momentos cumo l'actual.