El Conceyu de Cangas del Narcea ya l’Academia de la Llingua Asturiana organizan una edición especial del Día de las L.letras Asturianas en Cangas el vienres 19 d’abril.

El Teatru Toreno de Cangas del Narcea vei ser l’escenariu de la celebración d’una edición especial del Día de las L.letras Asturianas. El Conceyu de Cangas del Narcea ya l’Academia de la Llingua Asturiana son los encargaos d’organizar esti actu conmemorativu de las l.letras asturianas, que vei desenvolvese’l vienres 19 d’abril a partir de las 19:30 no Teatru Toreno.

La Presidenta de l’Academia de la Llingua Asturiana, Ana Mª Cano, recordóu que’l Día de las L.letras Asturianas celébrase’l primer vienres del mes de mayu ya que “nun puede sacase del Campoamor d’Uvieo”. Así a todo, estiañu, a propuesta del Conceyu de Cangas del Narcea, vei cuntar con una celebración previa en Cangas.

L’actu vei empicipiar cona presentación de la reedición del l.libru Vocabulariu de Cangas del Narcea a cargu del sou autor, Jesús Feito Calzón. Amás, l’actriz asturiana María Cotiello vei faer un recital de varios poemas recoyíos no Lletres Lliterariu, “un adelantu en primicia de la presentación que se fairá’l Día de las L.letras n’Uvieo”, asegura la Presidenta de l’Academia. Pa cerrar l’actu, Carlos Alba “Cellero” vei representar la obra Llázaro de Tormes.

L’alcalde cangués, José Luis Fontaniella, agradecíu’l xestu d’aceptar la colaboración pa faer una edición especial del Día de las L.letras Asturianas en Cangas a l’Academia ya destacóu que puede suponer “el principiu d’actuaciones distintas ya actividades no conceyu pa estas celebraciones”.
 

Imágenes