Cangas del Narcea, 13 de santamarina de 2020. El Conceyu de Cangas del Narcea vei acabar mañena'l programa "Exame seguru". Un programa qu'eichóu andar n'abril cono obxectivu de facilitar al alumnáu universitariu con dificultades de conexón a Internet l'accesu a una conexón bona pa faer los exámenes. En total participanon cuatro estudiantes que fixenon díaz pruebas no Centru de Dinamización Tecnolóxica del Conceyu (CDTL). "Prestóunos aidar a estos estudiantes que tuvienon qu'adaptase a la educación a distancia nun conceyu rural cumo'l nuesu", dixo la conceyala de Desenvolvimientu del Conceyu, Begoña Cueto Blanco, que xunto a la Conceyalía d'Educación fui la promotora d'esti proxectu pioneiru n'Asturias.

Namás fonon cuatro los estudiantes que tuvienon qu'acceder a la conexón del Conceyu pa faer las súas pruebas, anque dous vecinos más solicitanon l'accesu, pero a la final decidienon non faer usu d'esta opción. "Nun principiu, pensábamos que poderían ser más las solicitudes, pero alégranos saber que la conexón nun ía tan mala no conceyu", recalcóu Cueto Blanco, que recordóu que la operadora Orange vei faer una inversión estimada en 655.000 euros pa conectar a la fibra óptica a más de 3.900 casas ya negocios de la vil.la canguesa ya la súa esperanza de que, nun futuru, pueda meyorase tamién la conexón na zona rural.

Esti proxectu, que surdíu en Cangas, fui exportáu a outros conceyos, qu'adoptanon la idea p'aidar a los sous estudiantes durante'l confinamientu. "Nun descartamos tener que volver a eichalu a andar nun futuru", dixo la conceyala de Desenvolvimientu del Conceyu, que piensa qu'esti proxectu "garantiza la igualdá d'oportunidades". Los estudiantes participantes quedanon mui satisfechos cono programa, porque, gracias a él, pudienon faer las súas pruebas, chegando hasta a tener qu'usar ordenadores del Conceyu, al nun ser compatibles los sous conas plataformas ou s'examinaban. Tódolos estudiantes tenían algo de medrana a quedar ensin conexón nas súas casas en mitá de la prueba,  por eso decidienon optar pol "Exame seguru".