No parque de La Reguerala concentránonse los trabayos correspondientes a los conteníos formativos de cuatro módulos de los cinco que conforman el certificáu de profesionalidá "Operaciones auxiliares d'acabaos ríxidos ya urbanización", impartíos a las 8 personas beneficiarias del programa "Actívate", dirixíu a personas desempleadas durante muitu tiempu.

El programa, promovíu pol Conceyu de Cangas del Narcea ya subvencionáu pol Serviciu Públicu d'Empléu del Principáu d'Asturias, combina la formación teórica ya práctica del certificáu de profesionalidá cona obra rial. El 6 de marzu empicipióu la primera de las dúas fases na que ta dividíu'l programa, de trés meses de duración, nesta fase'l tiempu dedicáu a formación fui del 60 % ya la destinada a las obras programadas del 40 %. A partir del 6 de xunu empicipióu la fase segunda, onde'l repartu del tiempu inviértese, siendo'l 40 % del tiempu'l que se dedica a siguir formándose ya'l 60 % el que se dedica a la obra, destinada a convertise  nuna experiencia profesional.

Durante todu esti tiempu, la obra consistíu básicamente n'actuaciones sobre'l parque de La Reguerala, anque tamién se trabayóu na preparación de soportes pal revestimientu de los exteriores de la Escuela Taller.

No casu del parque de La Reguerala, distínguense dúas arias de trabayu, una centrada na fonte ya outra no pisu del restu del parque.

Actuaciones na fonte:

• Trabayos de l.limpieza, desescombráu ya saneáu.
• Eliminación d'elementos n'estáu malu.
• Saneáu ya regularizáu de soportes pal sou revestimientu.
• Trabayos d'arreglu de solera.
• Adecuación de la instalación de desagüe de la fonte.
• Meyora de las conducciones pa la caseta de bombéu.
• Arreglu de l'arqueta de bombéu: l.limpieza, desescombru, arreglu de paramentos, enfoscáu ya impermeabilizáu.
• Preparación de piezas ríxidas ya tratamientu de superficies pal sou revestimientu.
• Arreglu del pisu.
• Aplicación d'imprimación protectora a la piedra de la fonte.

 Actuaciones no parque:

• Selección de piezas n'estáu malu pa la súa sustitución.
• Faer pastas, morteiros ya adhesivos.
• Preparación de piezas ríxidas pa la súa colocación.
• Arreglu ya/ou sustitución d'elementos varios (rexas, desagües), saneáu ya preparación de soportes pa la súa colocación.
• Arreglu d'escalones, remates, asientos.
• Colocación del pisu.

D'eiquí p'alantre ya hasta qu'acabe'l programa'l 5 de setiembre, vei siguise conos trabayos d'arreglu de la fachada de la Escuela Taller, amás de cona impartición del módulu d'adoquináu ya hormigón impresu ya la obra correspondiente en viales de la vil.la canguesa.

El conxuntu del programa Actívate, destináu a personas desempleadas de muitu tiempu mayores de 25 años, supón la contratación de 8 personas participantes, un monitor ya una mentora. Yía un programa impulsáu pol Gobiernu del Principáu d'Asturias ya cofinanciáu pol Serviciu Públicu d'Empléu Estatal.  

Imágenes