Cono auditoriu chen de xente interesada no tema ya amantes del vinu, arrancóu a las 11:30 de la mañena del xueves 2 de febreiru la presentación de los resultaos del trabayu d’investigación ya desenvolvimientu tecnolóxicu del cultivu de la vide ya la elaboración del vinu’i calidá de Cangas. La encargada de faer la ponencia, la investigadora responsable del Programa d’investigación de viticultura del Aria de Tecnoloxía de los Alimentos del Serviciu Rexonal d’Investigación ya Desenvolvimientu Agroalimentariu (SERIDA), María Dolores Loureiro, esplicóu con detenimientu las formas diferentes de comportase de las vides asturianas sigún tipu de portainsertu, poda ya marcu de plantación que s’use. Anque los resultaos inda nun son concluyentes, porque l’estudiu tien de siguir ente tres ou cuatro años más pa dar datos fiables, obsérvanse variantes ya tendencias na cantidá de producción d’uva, no tamañu ya na mayor ou menor maduración de la mesma dependiendo del tipu de técnicas que se desenvuelvan no cultivu.

Amás, nesta xornada dedicada al vinu, la ponente María Dolores Loureiro, xunto con Paula Moreno ya Belén Suárez fixenon la presentación del sou l.libru Variedades de vid de Asturias. L.libru no que se describen, analizan ya identifican las variedades diferentes de vide qu’hai na nuesa zona.

Al acto asistienon el Conseyeiru d’Agroganadería, Albano Longo; l’Alcalde de Cangas del Narcea, José Luis Fontaniella, los Conceyales del Conceyu Cangas: Mónica Díaz, José Ramón Puerto ya José Manuel Menéndez; el Presidente de l’Asociación Vinu de Calidad de Cangas, Ángel Barrero ya’l presidente d’APROVICAN, José María Martínez.
 

Imágenes