L’Alcalde de Cangas del Narcea, José Luis Fontaniella, mostróuse arguyosu de poder “representar ya presentar ande quiera que vou a tódolos ganadeiros cangueses”. Pal Alcalde la XXVII Muestra ganadera de Raza Asturiana de los Val.les, celebrada no recintu ferial de La Imera de Cangas del Narcea los días 5, 6 ya 7 d’outubre, foi una demostración de la gran calidá ganadera que, pesie a los problemas económicos, especialmente cono aumentu del preciu los piensos de contino ya las torgas derivadas de los acotamientos de los pastos, exhibíu’l resultáu del gran trabayu que los ganadeiros desenvuelven conas súas vacas, volviendo a deixar el listón mui altu ya poniendo una vez más no númaru unu a las cabanas ganaderas del nuesu conceyu”.

Na XXVII Muestra ganadera, marcada pola incorporación de ganadeiros del conceyu nuevos a los certámenes, proclamánonse campeones de tipu normal na categoría de becerra, la vaca “Lucera”, de la ganadería de Pedro González de Brañas d’Abaxu; el premiu de vaca campeona foi pa “Polesa”, de María Soledad Rodríguez, de L’Outeiru ya’l toru campeón foi “Sol”, de Clara Pérez de Los Tablaos.

No tipu culón, declaróuse becerra campeona a la vaca “Estrella”, de la ganadería de Clara Pérez; la vaca campeona foi “Salada”, de José Manuel Rodríguez de Castru de L.lumés ya’l toru campeón nesta categoría foi “Marieyu”, de la ganadería de Faustina Martínez de Coubos.

Tódolos campeones recibienon un premiu metálicu de 150 euros ya un troféu. Tamién se premióu a los tres primeiros clasificaos de cadaguna de las secciones ya a los tres meyores lotes de corte de tipu culón ya normal. Nesti casu, los ganadores recibienon un troféu ya 70 euros, los segundos puestos fonon premiaos con 50 euros ya, p’acabar, el tercer puestu recibíu 30 euros. Amás, entregánonse dous premios de participación a las ganaderías de Casa Gaiteiru ya de Rubén González.

Nesta edición del certame participanon 164 vacas de 20 ganaderías canguesas provenientes de Coubos, L.lavachos, Xinestosu, Los Tablaos, Vil.larmental, Veiga, Castru de L.lumes, Las Cuadriel.las de Vil.lalái, Xedré, Castru Sierra, L’Outeiru, Robléu, Xichón/Gillón, Mieldes, Brañas d’Abaxu ya Parrondu.
 

Imágenes