El sábadu 20 d’abril la música de las gaitas vei chenar las cal.les ya los bares de la vil.la a las doce del mediudía ya a las ocho de la tarde. Amás, no Teatru Toreno a las 17:30 vei haber un conciertu d’Anabel Santiago ya David Varela.

Tambores ya gaitas van tomar las cal.les de Cangas del Narcea’l sábadu 20 d’abril con motivu de la III Entamada de gaiteiros. Muitos grupos de música tradicional de Cangas del Narcea ya d’outros conceyos, acompañaos polos xigantes ya cabezudos cangueses, amás de por diferentes bandas musicales, van xuntase pa convertir la vil.la nun gran escenariu ya nun escaparate de música tradicional.

Los músicos van siguir un recorríu que vei l.levalos a pasar polas principales cal.les de la vil.la ya pola mayoría de los bares. Esti recorríu van faelu a dúas horas diferentes, primeramente a las doce del mediudía hasta bien entrada la hora comer ya espuéis a partir de las ocho hasta la hora la cena.

Amás del recorríu musical polas cal.les de la vil.la, no Teatru Toreno, a partir de las 17:30, vei poder esfrutase de baldre de l’actuación d’Anabel Santiago ya David Varela.

Imágenes