Avelino García Arias, fotógrafu aficionáu cangués, eichóu a andar la súa primera exposición fotográfica na Casa la Cultura de Cangas del Narcea. “El camino encontrado”, títulu de la exposición, fai un recorríu polos xéneros fotográficos diferentes: el retratu, el paisaxe, la macrofotografía, ente outros que pueden visitase dende’l 15 al 30 de los santos.

Avelino García empicipióu na fotografía dende mozu con cámaras d’usar ya tirar. Pero foi hai cuatro años, cuando tomóu la súa afición más en serio ya empicipióu a profesionalizase “agora mesmo debo tener cinco ou seis cámaras ya nin se sabe cuántos obxectivos”, asegura.

Las fotos expuestas muestran partes de la rialidá nas que malapenas se repara na vida cotidiana, momentos ya miradas falan por sí solos ya tresmiten emociones ya sensaciones a quien los observa. Estas fotografías nun tán tomadas a lo xole, “las fotos tán anantes na mía cabeza, tengo un programa qu’indica las horas de l.luz en l.lugares diferentes ya una brúxula, yá dicir, cuando vou a por una foto, normalmente ta”, esplica Avelino García.

La exposición recói tipos de fotografías diferentes que tienen un nexu común “con estas fotos intento escapar de la típica foto de turista, creo qu’hai que crear algo nuevo, algo que la xente nun vea ya que-y l.lame l’atención, que la impresione”, comenta Avelino García.

Durante estos días, amás, la sala d’exposiciones de la Casa la Cultura agospia una segunda muestra fotográfica, nesti casu perteneciente a fotógrafos diferentes de l’Asociación de Fotógrafos de la Naturaleza del Principáu d’Asturias (AFONAS). Trátase d’una exposición itinerante titulada “Asturias, naturalmente”, ande pare retratada la flora ya la fauna del país en situaciones ya escenarios diferentes.