Cangas del Narcea, 10 de los santos de 2020. La Fiscalía Superior del Principáu d'Asturias alcordóu l'archivu de las dilixencias de la denuncia presentada polos populares contra l'alcalde de Cangas, José Víctor Rodríguez, na obra de la nave de Tubongu. El PP entendía qu'había delitu por chegar el gobiernu cangués a un alcuerdu cona empresa pública TRAGSA, constructora de la nave, pa fraccionar los pagos d'unas facturas que nun foran abonadas por un defectu d'alineación na execución de la obra. Un alcuerdu pal pagu de 710 280,48 euros, que fui anuláu pol propiu alcalde, espuéis de conecer un informe de la secretaria del Conceyu nel que se recoyía que'l créditu extraxudicial, al nun tar previstu no presupuestu, había ser aprobáu pol Plenu. 

"La resolución de la fiscal refuerza los pasos daos por esti equipu de gobiernu ya deixa claro que nun cometí niún delitu de prevaricación", manifestóu'l rexidor cangués güei pola mañena nuna rueda de prensa. Rodríguez reclamóu públicamente al presidente de los populares, José Luis Fontaniella, "que se retracte ya nun diga mentiras, en política nun val todo. Tien que dedicase a fader política útil pa los vecinos, non intentar sacar réditu con denuncias falsas a sabiendas". El rexidor deixóu claro que tódalas actuaciones se fixenon conforme a los informes municipales, "los pagos aplazánonse por un informe desfavorable de l'arquitecta del Conceyu, na que se recói qu'esa nave ta mal construida ya fuera d'alineación. L'alcalde recriminóu a los populares que la nave "tendría que tar feita de la lexislatura pasada ya asina nun tendrían qu'andar prometiéndola en cada campaña electoral", apuntóu, al tiempu que recordóu que "la obra fui una chambonada. El PP xuega con emporcar el día a día de la política del Conceyu con esti tema".

La segunda teniente de alcalde, Laura Álvarez, mostróuse mui satisfecha cono archivu de la causa, "tenía claro que se yiba archivar, lo único que fixemos fui siguir los informes técnicos. La persona que lo feixo mal fui Fontaniella, que construíu una nave de manera ilegal".

Rodríguez pergúntase quién tien que dimitir agora, fadiendo referencia a la petición que fixenon los populares pa que l'alcalde marchara por una cuestión que nun ía delitu, "nun vou pidir que dimita, pero espero que pida perdón públicamente". Nas propias dilixencias de la investigación, la fiscal ordenóu "decretar l'archivu de las actuaciones al nun revestir los feitos carácter de delitu".