La protesta de l.lagareiros, bodegueiros, productores y promotores, molestos porque la sidra ya'l vinu foran consideraos una droga, amás de la presión de los grupos d'oposición, consiguíu modificar el textu de la normativa feita pola Conseyería de Sanidá.
La Lei de Drogas futura, qu'hasta vei cambiar el sou nome pa incorporar un apartáu sobre alcohol, suavizóu'l tratamientu que daba a estas bebidas, a las que de primeras incluía no grupu de substancias adictivas xunto cona cocaína, la heroína ya'l cannabis.

Ente los cambios que se contemplan :
Van poder faese promociones ya publicidá pal vinu de Cangas, al ser consideráu productu de Denominación d'Orixe Protexida ou d'Indicación Xeográfica Protexida.
La sidra ya'l vinu de Cangas nun van recibir tratamientu de droga, cumo hasta agora, senón que tendrán un apartáu específicu referíu al alcohol.
La ponencia de la Xunta Xeneral introduz modificaciones importantes. La primera, consensuada por tódolos grupos, foi cambia-y el nome, yá nun vei ser L.lei d'Atención Integral en Materia de Drogas senón L.lei d'Atención Integral en Materia de Drogas ya Bebidas Alcohólicas.

Esto vei permitir que productos cumo la sidra ya'l vinu de Cangas reciban un tratu diferenciáu al d'outras substancias adictivas. Pero'l cambiu de trescendencia yá'l de los artículos 20 ya 21, que primeiro prohibían la promoción ya publicidá de tódalas bebidas alcohólicas, ensin distinción, polo qu'afectaba negativamente a productos del país cumo la sidra ya'l vinu de Cangas.

La l.lei del alcohol futura introduz una excepción ya recói que la prohibición «nun vei afectar a bebidas alcohólicas sometidas a Denominación d'Orixe Protexida ou a Indicaciones Xeográficas Protexidas propias circunscritas al Principáu d'Asturias». Esto vei permitir que la sidra ya'l vinu de Cangas puedan promocionase l.libremente, anque habrán de fadelo a más de 200 metros del perímetru de centros educativos ou de centros sociales destinaos al apoyu de personas con alcoholismu.