Cangas del Narcea, 8 de marzu de 2021. El Conceyu de Cangas entregóu güei pola mañena los premios de deseñu de mázcaras que fixenon 310 alumnas ya alumnos de 1^u ya 2^u de la ESO del Institutu de Cangas. El concursu taba dientro del proxectu añal "Educando n'Igualdá", que fai la Conceyalía de la Muyer ya que, nesta edición, adaptóuse a la situación sanitaria, trabayando nel aula dende'l pasáu 25 de los santos hasta güei, mensaxes de respetu, igualdá ya rechazu a la violencia de xéneru.

"Ía fundamental fomentar la igualdá dende los centros educativos", dixo la conceyala de Salú Pública, Igualdá, Muyer ya Servicios Sociales de Cangas del Narcea, Carmen López, que recordóu que la l.luita del 8 de marzu, na que se celebra'l Día Internacional de la Muyer, ía necesario conmemorala cada anu hasta consiguir la igualdá de xéneru plena en tódolos ámbitos de la sociedá. Pola súa parte, l'alcalde de Cangas, José Víctor Rodríguez, recordóu que "esti equipu de gobiernu siempre apostóu pola igualdá de manera clara ya con partida económica, subiendo'l presupuestu cada anu", dixo al tiempu qu'anuncióu que "enguano vei inaugurase en Cangas el Serviciu d'Atención Psicolóxica a víctimas de violencia de xéneru, que vei cuntar con una psicóloga, pa reforzar el Centru Asesor de la Muyer".

Ente los trabayos presentaos taban mázcaras a favor de la igualdá ya l'emponderamientu de la muyer, pero tamién deseños en contra de la violencia de xéneru. A la final, las ganadoras fuenon Dulce Selene Romero González, estudiante de 1^u de la ESO, ya Ana Álvarez Gayo, estudiante de 2^u de la ESO. La mázcara de Romero recordaba a dalgunas de las víctimas asesinadas por violencia de xéneru cumo la traxedia de las paxarinas, na que se recuerda a las harmanas Minerva, María ya Dedé, amás d'a outras asesinadas polas súas pareyas, cumo Mónica Linde ou Olga Savenchuk, nomes grabaos no deseñu, que recupera en forma de cruz las frases: "Hermana, yo sí te creo" ya "Calladita no estoy más guapa". La mázcara d'Álvarez Gayo fui escoyida pol xuráu, conformáu polos departamentos d'Orientación ya Plástica del IES, amás de pol Aria d'Igualdá del Conceyu, ente las dúas ganadoras, pa ser impresa, porque representaba con claridá la igualdá ente homes ya muyeres al traviés del símbolu femenín ya masculín, uníos pol símbolu matemáticu igual. La mázcara tien, amás, un l.lazu moráu grande, símbolu de repulsa pa cona violencia de xéneru,  que tamién ía usáu durante'l 8M pa reivindicar la igualdá plena ente muyeres ya homes.

L'alcalde fui l'encargáu d'entregar los premios a las ganadoras, un maletín pa tresportar material escolar, amás de las mázcaras que van ser repartidas ente l'alumnáu participante ya'l profesoráu. En total, imprimiénonse mil mázcaras, que van aídar a protexese de la COVID-19, amás d'al alumnáu participante, a las socias de las 27 asociaciones de muyeres del conceyu. Las ocho clases participantes nesti concursu escoyenon el meyor deseñu de cadaguna de las clases ya los debuxos van ser publicaos no númaru próximu de la revista del centru El Cuco, amás de nas redes sociales del institutu. El centru educativu feixo unos días antias una actividá cono alumnáu pa dar a conecer a muyeres científicas ya esta sumana vei fader una actividá, en colaboración cono CRA Río Cibea, pa grabar ya producir un podcast con motivu del Día Internacional de la Muyer.

Dada la creatividá de la rapacería, recuérdase a las ya los estudiantes, que sigue abiertu'l plazu pa presentar vidios al concursu de Tik Tok Cangas del Narcea pola igualdá hasta'l 10 de marzu ya que las personas ganadoras van poder competir nuna fase a nivel nacional. 

El Gobiernu del Conceyu vei proponer na comisión d'igualdá próxima una moción, que vei aprobase no plenu próximu, cono obxectivu de velar pola igualdá d'oportunidades ente muyeres ya homes, educar en valores d'igualdá de tratu, abrir el Serviciu d'Atención Psicolóxica a víctimas de violencia de xéneru, fader acciones aprobadas no Plan d'Igualdá del Conceyu ya siguir destinando presupuestu al Aria de Muyer pa fader acciones ya mididas recoyidas no Plan d'Igualdá d'Oportunidades del Conceyu.