Uvieo, 10 de setiembre de 2020. Pesie a la situación especial d'estiañu, la SOF nun quier faltar a la súa cita añal con tódolos socios ya vecinos d'Uvieo, polo que repartirá'l bol.lu ya'l vinu coincidiendo cono día grande de las fiestas de San Mateo. La entidá pretende, con esti actu ya outros que tien previsto celebrar, recuperar la ilusión de toda la población uvieína, en particular, ya asturiana, en xeneral, nestos momentos complicaos que tamos viviendo.

Con esi ánimu, la Sociedad Ovetense de Festejos, la DOP Vinu de Cangas ya'l Conceyu de Cangas del Narcea cheganon a un alcuerdu pa que'l bol.lu de San Mateo se reparta acompañáu pol vinu de la Denominación Protexida de Cangas.

Vei repartise un vinu compuestu pola mezcla d'uva de verdéu negru, albarín negru, carrasquín ya mencía, cosecha 2019. Trátase d'un vinu atlánticu, heroicu, cien por cien asturianu, de muita calidá ya feitu conas prácticas tradicionales, a las que s'aplicanon, eso sí, procesos tecnolóxicos ya enolóxicos modernos, orientaos a la meyora del productu final, que vei poder degustase cono bol.lu'l 21 de setiembre.

Esta apuesta de la SOF polos productos asturianos pretende impulsar la promoción del vinu DOP Cangas, al tiempu que los socios disfrutan del meyor acompañamientu pal bol.lu de las súas fiestas.

Trátase d'un "alimentu del paraísu" ya qu'había tar presente en tódalas mesas d'Asturias, amás d'en presentaciones oficiales ya eventos, por ser el vinu únicu con Denominación d'Orixe Protexida d'Asturias.

Etiqueta

Las botellas cuntan con un etiquetáu especial pa la ocasión. Esti deseñu conmemorativu fui creáu pol artista cangués Francisco Redondo, qu'usa unas uvas cumo protagonistas principales de la etiqueta, na que se recuerda que la relación de San Mateo conos viticultores vien de l.lonxe ya qu'ía, de feitu, unu de los santos a los que, de forma tradicional, piden aída los cachicanes pa que protexa las súas viñas.

Apoyáu pola imaxe corporativa de la DOP Cangas, constrúise'l deseñu. Úsase'l color azul del escudu de la Sociedad Ovetense de Festejos ya la cruz, de color mariel.lu, na parte superior, fadiendo referencia a la que preside la torre de la catedral, incorporando no mediu las uvas.

El bol.lu

Igual que'l vinu, tamién se cudióu la calidá del bol.lu, que vei ser feitu con ingredientes de calidá alta por dúas empresas con tradición d'Uvieo: Alimentación Montes, que cuntan con premios importantes respectu a los sous embutíos ya fai chorizos con carne de xatu ya gochu d'animales criaos n'Asturias ya La Masera de Vetusta ya Casa Lupe, que van fader el pan con una farina especial que mezcla trigu de Castía ya d'Andalucía.

Protocolu de seguridá

 La SOF desea que tódolos sous socios puedan recoyer el bol.lu al ser un actu tradicional, con esti obxectivu, establecíu un protocolu de seguridá citando a los socios en franxas horarias diferientes pa que nun se produzan aglomeraciones. Amás, planteóse una división de recorríos ya implementánonse las mididas de control pa que se respete la distancia social ya las mididas d'hixene, evitando cualquier riesgu, por mínimu que sea, no procesu.

La entidá convida a tódolos socios a disfrutar del día ya a participar d'esti actu emblemáticu de las fiestas d'Uvieo con responsabilidá. 

El compromisu de la SOF yía ofrecer a los sous socios un bol.lu ya un vinu de calidá máxima nestas circunstancias adversas, tal ya cumo se vien fadiendo dende hai 73 años el día de San Mateo.