El degañés Iván Menéndez trai a Cangas del Narcea’l sou documental Los colores del viento, espuéis de tenelo presentao de forma oficial na 50 edición del Festival Internacional de Cine de Xixón, el pasáu 29 del mes muertu.

El documental d’Iván Menéndez cunta la historia de Francine Marcelle en Muniel.los. Francine Marcelle yá una muyer francesa de 50 años que vive sola no pueblu abandonáu d’El Corralín, asitiáu nunu de los val.les que conforman la Reserva de la Biosfera de Muniel.los.

El xermen de la historia, plasmada en Los colores del viento, surde en 2009 cuando Iván Menéndez decide visitar a Francine Marcelle ya propón-y siguila cona cámara pa cuntar la súa historia. El.la accedéu a colaborar ya durante tres años Iván Menéndez ya’l sou equipu grabanon el sou día a día n’El Corralín. El resultáu final foi Los colores del viento, un documental que, sigún l’autor, reflexa cúmo una persona al traviés de la voluntá ya l’amor yá quien a consiguir todo lo que quier, ensin cuartos ya cuasi ensin ayuda.

El proxectu nun foi financiáu por niuna institución ya pretende ser una obra didáctica sobre’l mediu ambiente ya cúmo tratalo, a la vez que busca poner de manifiestu la gran capacidá que tienen los seres vivos pa sobrevivir nas condiciones más adversas.

La proxección del documental en Cangas del Narcea vei faese’l xueves 28 de febreiru a las 19:00 no Teatru Toreno, ande amás el sou director Iván Menéndez vei faer una presentación del sou trabayu. La entrada yá dafeitu de baldre.