El protectoráu de socios del Clinic Joven EMPREND@, formáu pol Gobiernu del Principáu d'Asturias, las Cámaras de Comerciu, FADE, Caja Rural d'Asturias, Universidá d'Uvieo, Conceyu d'Avilés, Conceyu de Cangas, Conceyu de Xixón, IDEPA, AJE, CEEI ya Valnalón tien el placer de comunicar l'apertura del plazu d'inscripción al programa pa mozas/os emprendedoras/es que van participar na XV edición del programa CLINIC no mes de setiembre de 2021.

El Programa de Rendimientu Emprendedor Altu de Clinic Joven EMPREND@ ía una  iniciativa pionera na Unión Europea pa la capacitación del capital humanu mozu, que pretende, principalmente, ser una plataforma d'intercambiu d'ideas emprendedoras ya un elementu dinamizador de las iniciativas nesti sentíu, amás d'un puntu d'unión pa la cooperación ente mozas/os emprendedoras/es, un referente de difusión ya sensibilización en materia de cultura emprendedora ya una escuela de líderes emprendedores p'Asturias. Constitúise cumo una cantera moza auténtica pal desenvolvimientu d'empresarias/os que lideren el sou propiu negociu ou intraemprendedoras/es n'outra empresa ou organización, tamién cumo emprendedoras/es sociales. Supón desenvolver un Centru de Rendimientu Emprendedor Altu, con un programa de muitu impactu, similar al usáu con deportistas d'elite nos centros de tecnificación deportiva. El programa ía gratuitu ya fui reconecíu ya premiáu cumo:

• Exemplu de bonas prácticas emprendedoras pol Conseyu Superior de Cámaras de Comerciu d'España
• Premiu Nacional CECAP 2009-2010 a la iniciativa formativa innovadora
• Exemplu de bona práctica emprendedora nas redes de ciudades CIDEU (de la que forma parte Xixón) ya del Arcu Atlánticu (de la que forma parte Avilés)
• Premiu a la iniciativa de marketing non lucrativu d'Asturias 2013.

Los obxectivos del Programa Clinic son:

1. Fomentar l'espíritu emprendedor ente la rapacería.
2.  Espertar ya/ou madurar vocaciones emprendedoras ente las guilopas ya guilopos n'edades comprendidas ente los 18  ya los 33 anos aprox.
3. Impulsar las trés vocaciones emprendedoras: emprendedoras/es empresarias/os,  intraemprendedoras/es ya emprendedoras/es sociales.
4.  Facilitar el desenvolvimientu competencial  integral ya en valores de las personas, líderes empresariales, sociales ya profesionales del futuru.
5.   Entrenar las habilidades ya competencias claves pa liderar los proxectos emprendedores.
6. La rapacería participante (prioridá 18 a 33 anos) representan las 3 vocaciones emprendedoras:

•  Emprendimientu social (iniciativas ensin ánimu de lucru, ONG, asociación, fundación ou causa social anque inda nun tenga personalidá xurídica constituida)
• Intra-emprendimientu (iniciativas profesionales pa liderar retos ya proxectos trabayando por cuenta ayena dientro d'una empresa, ONG, entidá ou alministración pública)
• Emprendimientu empresarial (con ánimu de lucru, bien cumo autoempléu, bien creando sociedades, sean d'economía social ou SL que xeneren empleos añidíos)

El Clinic 2021 vei desenvolvese durante dúas sumanas intensas d'entrenamientu, del l.lunes 1 de setiembre al vienres 10 de setiembre n'Avilés, Cangas ya Xixón.

Del total de los 25 participantes, hasta un máximu de 8 mozas/os emprendedoras/es del conceyu de Cangas van poder formar parte de la escoyeta d'ente más de 200 candidaturas. 

El CLINIC 2021 vei fadese en Cangas ente los días 3 ya 5 de setiembre.

La metodoloxía innovadora de valor añidíu del programa CLINIC supón la combinación de retos, sesiones técnicas, alcuentros, visitas, entrenamientos competenciales, diagnósticos d'autoconecimientu, presentaciones, autoconecimientu, desenvolvimientu de planes de meyora, etc. nas más de 130 h de programa en xornadas intensivas de 10 a 12 horas diarias d'entrenamientu emprendedor compartíu. 

El programa del CLINIC 2020 no conceyu de Cangas inclúi:

• Retos experienciales pal entrenamientu ya desenvolvimientu de las 15 competencias tresversales claves pal éxitu emprendedor
• Mesa redonda "Emprender en Cangas del Narcea"
• Xanta de trabayu "alcuentros con" asociaciones, iniciativas, líderes exemplares ya empresarias/os del conceyu
• Visitas a iniciativas emprendedoras singulares del conceyu de Cangas del Narcea
• Sesiones técnicas formativas

Las inscripciones van poder fadese dende marzu ya hasta la fecha tope del vienres 4 de xunu na web del CLINIC en:  www.asturiasemprenda.org

El Programa Clinic JOVEN EMPREND@ ía una actuación promovida pola Asociación Asturias EMPREND@.

Nas súas 14 ediciones anteriores yá vivienon el CLINIC  más de 375 participantes.