La ocupación humana empicipia cona prehistoria, cumo lo demuestran los túmulos funerarios identificaos no territoriu ya las bruesas de la Edá del Bronce atopadas en Muniel.los, Moncóu, Cangas, L.larón ou Cibea. N’época prerromana el conceyu ta pobláu pola tribu ástur de los Pésicos, de la que s’identificanon una trentena d’asentamientos fortificaos, muitos más tarde romanizaos dada la vinculación de la súa existencia a la extracción d’ouru.

Yá, nun hai duda, la fundación del monesteriu de Courias polos Condes Piñolo ya Aldonza’l feitu más destacable na Edá Media, dada la importancia qu’alcanzóu esti señoríu monásticu en todu l’occidente asturianu ya no norte de la meseta castellana. El nuesu territoriu asitíabase nas “Asturias occidentales ou de Tinéu”.

En 1255 el rei Alfonso X concedíu la carta puebla a la vil.la de “Cangas de Sierra”. La concesión rial referida yiba suponer el principiu d’una etapa nueva pal territoriu suroccidental, qu’atravesaría un períodu convulsu de rivalidades ente los señores principales, acabando cona renuncia de Diego F. Quiñones, primer Conde de Luna, a las “cuatro sacadas” (Cangas, Tinéu, Llanes ya Ribesella) ya volviendo éstas a poder rial; nesas dóminas yá esfrutaba l’entós cotu de Brañas/Leitariegos (Brañas/Leitariegos, Trescastru ya Cabuezos) de los privilexos ya franquicias concedidas por Alfonso XI (añu 1326) a los sous pobladores, en reconocencia a las atenciones constantes d’éstos hacia los que transitaban por estos territorios tan malos.

La decadencia progresiva de los señoríos provoca que suban las rentas al campesináu, causando tensiones evidentes ente los que las l.lievan en renta ya la nobleza de la zona: los Oumaña, los Peñalba ou los Queipo de Chanu, que pasín ente pasu trataban de recuperar los drechos señoriales, asistiéndose a un momentu constructivu relevante.

Las ideas ilustradas de Joaquín J. Queipo de Chanu, quintu conde de Toreno, dan pía a plantear los primeiros proxectos d’explotación industrial de los recursos del conceyu, presentando estudios de yacimientos ya canteras ya proponiendo la construcción de vías de comunicación a la economía de subsistencia desenvolvida hasta’l sieglu XVIII. Sería la explotación de la madera de Muniel.los ya outros montes con destín a los astilleros de Ferrol el principiu de l’actividá extractiva de los recursos del conceyu. Tala actividá nun xeneróu cambios substanciales na vida campesina, tampouco influíu na nacencia d’iniciativas que pretendían una industrialización del conceyu, lo que provoca una corriente migratoria hacia Madrí ya, en menor midida, hacia América.

La invasión napoleónica motiva la creación d’un reximientu propiu que l.luitóu nas principales batallas de la Guerra de la Independiencia, destacando tamién los guerrilleros cangueses Pedro del Troncu ya José Flórez Sierra. D’outramiente, foi José María Queipo de Chanu, conde de Toreno, quien foi dunviáu cumo embaxador d’Asturias a Inglaterra cuando l’alzamientu provincial de 1808 contra los franceses.

Durante la segunda mitá del sieglu XIX Cangas foi cabeza de distritu electoral, alternándose no poder l.liberales cumo José Francisco Uría ya Riego ya conservadores cumo los condes de Toreno.

La vida política de principios del sieglu XX favorez l’aparición de l’agrupación obrera “Nueva vida” vinculada a la UGT, sucediéndose na época republicana corporaciones municipales de signu conservador ya socialista hasta’l principiu de la Guerra Civil.

Sería a partir de los años cincuenta ya, sobre todo, nas décadas del sesenta ya’l setenta cuando la minería del carbón s’instala con fuerza en Cangas del Narcea, permitiendo un desenvolvimientu económicu rápidu.