La casa

El poblamientu rural de Cangas del Narcea ta compuestu por gran cantidá de núcleos pequenos dispersos por faldas de montañas ya fondos de val.les. Tamién existen asentamientos d'ocupación estacional, las brañas, asitiadas en zonas más altas ya usadas con fines ganadeiros no branu.

El modelu más arcaicu de vivienda respuende a la tipoloxía de casa circular, hariede directa de las construcciones castreñas. Compuénse d'una paré de mampostería de piedra, teitu vexetal de paya de centén ya división interna de madera ou piedra que separaba los cuartos de la vivienda del ganáu.

Esti modelu evolucionóu hacia la casa terrena, de namás un pisu cuadráu. A veces aprovechábase'l desnivel del tarrén, orixinando dúas alturas en dalgunas partes. La casa constaba de l.lariega (cocina), los cuartos, la corte ya'l parreiru. La cubierta yera de l.lousas de pizarra, principalmente.

Esta tipoloxía foi evolucionando hacia la casa de dous pisos, que yá'l tipu de casa tradicional más presente a día de güei. La corte ocupa'l pisu terrenu ya la vivienda agospiase encima no primer pisu, que puede tener cordor. La vivienda cunta con cocina, cuartos ya sala. Cada casería cunta con varios edificios agrupaos alredor del corral, cuasi siempre cerráu por una paré.

Horrios ya paneras

Trátase de las edificaciones auxiliares más importantes de la casa. Los horrios son de planta cuadrada, construíos en madera ya l.levantaos sobre piol.los, patas de madera, piedra ou mampostería. La cubierta puede ser de l.lousa de pizarra ou de paya de centén (más arcaica). Val pa guardar la grana, l'embutíu curáu ya outros productos agrícolas, guardándolos de la humedá ambiental ya de los ratos. Los horrios más antiguos del conceyu datan del sieglu XVII.

Las paneras surden a finales del sieglu XVIII cumo consecuencia del desenvolvimientu agrícola impulsáu pola chegada de productos nuevos cumo'l maíz ya la pataca. Son de pisu rectangular, tienen 6 ou más piol.los ya incorporan cordor, ande se puen a secar el maíz.

La decoración de hórrios ya paneras forma parte del denomináu “estilu Ayande”, siendo'l tetrasquel el motivu decorativu más abondante. Destaca'l taller de Gabriel d'Yriarte, vascu afincáu na zona que fadía tallas más orixinales ya de mayor calidá.

Molinos

Cangas del Narcea cunta con numarosos molinos hidráulicos debío a la existencia de muitos caudales d'augua. Asitiaos a la vera los l.lugares, usábanse pa moler centén, trigu, maíz ya escanda. El molín podía ser d'usu priváu ou de maquila, nesti casu'l molineiru cobraba n'especie una parte de lo molío.

Outros aparatos que tamién aprovechaban la fuerza hidráulica pal sou funcionamientu yeran los batanes, pa trabayar la l.lana ya los mazos, pa trabayar el fierru. En Bisuyu puede vese El Mazu d'Abaxu.

Cortinos

Son unas construcciones circulares de piedra, d'unos dous metros d'altu, que guardan los truébanos ya'l miel tanto del fueu cumo del ataque del osu.

Corripas ou xoxas

Son outras construcciones circulares, pero de menos tamañu que los cortinos. Pueden alcontrase nos montes de castañares ya úsanse p'almacenar los arizos de las castañas pal sou secáu ya la súa extracción posterior.