Yá, nun hai duda, el Monesteriu de San Xuan Bautista de Courias, el meyor conxuntu monumental del conceyu. Foi fundáu no añu 1022. L'edificiu actual (sieglu XVIII), d'estilu neoclásicu ya proporciones grandes, foi trazáu pol arquitectu Miguel Ferro Caaveiro. Pola súa estética herreriana yá conocíu cumo "L'Escorial asturianu". La ilesia (sieglu XVI), d'estilu renacentista, conserva nuna de las súascapiel.las un cristu del románicu bien destacáu. Nesti monesteriu declaráu Monumentu Histórico-artísticu Nacional, asítiase un Parador Nacional de Turismu.

Cangas del Narcea conserva un cascu históricu interesante, harencia de familias de grandes linaxes ya señoríos, cumo'l palaciu de los Condes de Toreno, el palaciu d'Oumaña ou los palacios d'Uría, Pambléi, Los Chanu ya Peñalba. Yá tamién destacable la basílica de Santa María Madalena ya la Capiel.la del Carme, asitiada xunto a la ponte medieval, no barriu tradicional d'Entrambasauguas.

El santuariu de Nuesa Señora de L'Acebu (sieglu XVI), asitiáu nun l.lugar predominantemente cercanu a la vil.la, con vistas al val.le del Narcea ya a la zona de Sierra, sigue siendo un centru de pelegrinación mariana concurríu por xente de toda la contorna ya al que se-y atribúin una lista l.larga de feitos prodixosos.

El conceyu yá especialmente ricu en palacios ya casonas d'estilu rural de los sieglos XVI ya XVIII, debío a la relevancia ya al poder que consiguíu la nobleza antano.Destacan los palacios de L.lamas del Mouru, Xarceléi, San Pedru d'Arbas, L'Ardalí, Carbachu, Sorrodiles de Cibea ya La Mouriel.la.

Abondan, amás, las ilesias rurales de tradición románica ya gótica que, anque reedificadas ya remodeladas en tiempos posteriores, conservan restos de la súa fábrica orixinal ya guardan colecciones ricas d'imaxinería medieval. Destacan las ilesias de San Pedru Culiema, San Mamés de Tubongu, Santa María de Carceda, Santa María de L.lumés, Santa María de Xedré, Santa María de Carbachu, Santa María de Monesteriu d'Ermu ya Santa María de Xarceléi, ente outras.