CANGAS DEL NARCEA, 8 DE XUNU DE 2020.

L'Asociación de Profesionales ya Empresarios Autónomos del Suroccidente Asturianu (APESA), en colaboración cono Conceyu de Cangas del Narcea, presentóu güei pola mañena la plataforma "Apesa en casa". Un market place con más de mil productos de 35 empresarios/as de la comarca, nel que ponen a la venta los sous productos al traviés d'Internet na web www.apesaencasa.com.

Durante la presentación, l'alcalde de Cangas del Narcea, José Víctor Rodríguez, valoróu positivamente esta web nueva que vei permitir al comerciu de Cangas competir n'Internet: "gracias al conveniu, dotáu con 6000 euros ya firmáu pol Conceyu ya APESA", recordóu Rodríguez, qu'animóu a vecinas/os ya xente de fuera de la contorna a comprar nesta plataforma nueva. "Los comerciantes fonon los primeiros en responder durante l'estáu d'alarma, agora tócanos a nós volve-ys l'esfuerzu consumiendo no local", insistíu'l rexidor. Pola súa parte, el presidente d'APESA, Héctor Díaz, explicóu que: "trabayamos a dúas escalas, a nivel local, onde pueden repartise los productos nun día, ya a nivel nacional, pa facer los dunvios a cualquier parte d'España". La web nueva mostróuse durante la presentación, na que se demostróu'l funcionamientu de la mesma.

Na plataforma, los clientes pueden alcontrar productos d'alimentación, ferretería, bricolaxe, xardinería, caza, pesca, cudiáu personal, deporte, dietética ya nutrición, electrodomésticos, xoyería, reloxería, l.librería, oficina ya consumibles, óptica, regalos, xuguetes, roupa, calzáu, complementos ya servicios gráficos ya d'imprenta. La web tien un deseñu d'usu fácil nel que las personas consumidoras pueden buscar el sou comerciu preferíu, filtrando la busca con criterios cumo lo más vendío, lo más popular, el meyor valorao ou el más reciente. Las xente usuaria ha rexistrase pa poder fer las súas compras, lo que vei permitir acceder fácilmente a pidíos nuevos ya comprobar l'estáu de los mesmos que van mandase a cualquier puntu d'España. "Apesa en Casa" dispón d'un sistema de carritu de la compra nel que la clientela puede ir introduciendo los productos de cada comerciu antias de fer el pagu. Amás, la plataforma cunta con una lista de deseos que cada cliente puede personalizar,  pa que los sous familiares  ya amigos puedan acertar a la hora de fer un regalu. La clientela vei poder recibir los sous productos en menos de 24 horas. "Apesa en casa" aparecíu debío a la situación provocada pola aparición del Covid-19, qu'obligóu al cierre forzáu de la mayoría de las empresas asociadas a APESA. Énte esta situación, propúxose a los comerciantes la posibilidá de trabayar no desenvolvimientu d'una plataforma de venta online conxunta que xuntara a sectores empresariales diferientes ya permitiese a los comerciantes poder trabayar conos sous clientes potenciales nesta canal nueva.