"Voces del Narcea" yía la vía de comunicación nueva que dende'l Conceyu establecemos conos vecinos de Cangas del Narcea. Una revista cona que se pretende aveirar la rialidá de la Casa Conceyu ya del conceyu a tódalas casas de Cangas, cono obxectivu d'abrir una ventana informativa de tresparencia ya claridá a la Casa Conceyu.
Un boletín informativu que nun vei suponer niún gastu extra a las arcas del Conceyu, porque vei tar supeditáu al patrociniu d'empresas diferientes de la zona ya que naz cona intención única de satisfacer el drechu a la información  de la ciudadanía. Nesti sentíu, nun puede esqueicese que'l nuesu compromisu, cumo representantes políticos de Cangas, ta conos nuesos vecinos ya, polo tanto, yá 'l nuesu obxectivu principal poder aveira-ys ya da-ys a conecer l'actividá que se desenvuelve no nuesu Conceyu. 

Nas fueyas d'esti boletín informativu van ir explicándose dalgunas de las actuaciones qu'esti equipu de gobiernu desenvolvíu nesti primer añu ya mediu al frente del gobiernu. La más importante, nun hai duda, foi racionalizar el gastu de la institución hasta alcanzar un aforru de más d'un millón d'euros respectu a la lexislatura anterior, todo esto manteniendo las inversiones n'obras ya la prestación de servicios de calidá. Un esfuerzu de xestión económica eficiente ya austera necesariu dafeitu pa dotar al Conceyu de capacidá p'afrontar la crisis. Amás, quixemos acabar cona práctica sistemática de morosidá d'esti Conceyu, que, nos años últimos, l.levóu al consistoriu a adeudar 4, 2 millones d'euros  a los sous proveedores, liquidando esa deuda ya estableciendo'l pagu de facturas dientro d'unos plazos razonables.
Cumo dixemos, la eficacia na xestión, l'austeridá ya l'aforru en gastos superfluos nun nos feixo deixar las obras necesarias, cumo las feitas nos pueblos de Trones ya Las Defrades, nin deixar de consiguir financiación p'arreglar la ponte colgante de la vil.la. Amás, tamién se fixenon acciones de bacheáu ya desbroces en carreteras del conceyu, anque somos conscientes de que queda muito por facer.
En definitiva, la creación del boletín informativu yá una muestra más de la política de tresparencia que dende esti Conceyu tamos desenvolviendo, faciendo públicas las decisiones ya los proxectos añales. Por todo, confiamos en que "Voces del Narcea" se convierta nuna ferramienta de comunicación útil ya que valga de nexu d'unión ente l'alministración ya la ciudadanía. Pa descubrilo, convidámoste a mirar nas  súas páxinas ya fader un repasu polos acontecimientos últimos del nuesu conceyu.  
Un saludu cordial del vuesu alcalde

N^u 1, el mes muertu,2012 (pdf. 3.390 Kb)

N^u 2, xineiru, 2014 (pdf. 4.739 Kb)