Cangas del Narcea, 4 d'outubre de 2020. Na xornada de güei féixose entrega de los premios a las 30 ganaderías participantes na XXXV Muestra Ganadera del Conceyu de Raza Asturiana de los Val.les, que se celebróu durante'l fin de sumana no recintu ferial de La Imera, en Cangas del Narcea. Un concursu nel que la competición "touvo mui reñida", sigún aseguróu la conceyala de Mediu Rural ya Agroganadería, Ada Riesco, que destacóu la morfoloxía bona de los 235 animales participantes. "Apostemos mui fuerte pola celebración d'esta muestra en plena pandemia, pero xuntando esfuerzos todo puede consiguise", apuntóu la edil que chufóu'l comportamientu ya l'esfuerzu feitu por tódalas ganaderías.

Los premios entregánonse nesta edición d'una manera especial, pa dar cumplimientu al protocolu ya garantizar las distancias interpersonales ente las personas que representaban a cadaguna de las ganaderías, por eso s'escoyíu la entrega individualizada. Al actu acudíu l'alcalde cangués, José Víctor Rodríguez; el director xeneral de Ganadería ya Sanidá Animal del Principáu d'Asturias, Nino Rodríguez; el director d'Agricultura ya Pesca de la Delegación de Gobiernu d'Asturias, Enrique Rodríguez Nuño ya'l presidente de la Xunta Xeneral del Principáu, Marcelino Marcos Líndez. El rexidor quixo felicitar a tódalas ganaderías, al tiempu que valoraba'l sou trabayu: "Sois un sector fundamental pal nuesu conceyu, qu'ía'l mayor productor de carne d'Asturias", recordóu Rodríguez.

Esti concursu convertíuse no primeiru en celebrase de manera presencial en toda Asturias espuéis de la pandemia, algo que valoranon mui positivamente las ganaderías participantes, qu'en todu momentu cumplienon cono protocolu sanitariu establecíu. "Fixénonlo muito bien, ía un pasu p'alantre pa que no futuru puedan organizase eventos parcíos", recalcóu l'alcalde. Rodríguez manifestóu la necesidá d'axilizar, por parte de las alministraciones, tódolos trámites pa contribuir a que la xente nueva s'incorpore al sector, "yía fundamental de cara a que las mozas ya los mozos se queden nas explotaciones  ya nun abandonen el mediu rural", apuntóu.

Premios

Tódalas ganaderías que participanon na muestra sintiénonse premiadas al poder celebrar esti concursu de manera presencial, porque, amás de dar cuenta de la morfoloxía ya la valía de las vacas, fai que suba'l preciu de los animales.  El xuráu valoróu las 36 secciones del concursu ya escoyíu estiañu a Titanic ya a Soberana cumo campeones de la muestra en tipu normal. Titanic, de Pedro González Gonçalves, de Brañas d'Abaxu, revalidóu un títulu, que tamién consiguienon outros animales d'esta ganadería, cumo'l tercer premiu de machos tipu normal de 1 a 2 años pa Señor, la campeona de femas tipu normal de 6 a 11 meses pa Maravilla, que tamién se feixo como premiu a la meyor xata del certame; el segundu premiu en femas de tipu normal de 11 a 14 meses pa Macarena, el primer premiu en femas de 26 a 31 meses pa Brañera ou'l primer premiu de machu tipu normal de 2 a 4 años, que tamién conseguíu Titanic, ente outros.  La meyor vaca del concursu tipu normal, Soberana, vien de la ganadería de Rocío Lago Collar de Las Cuadriel.las de Vil.lalái. Esta ganadería tamién conseguíu outros premios no concursu, cumo'l primer ya'l segundu premiu en femas tipu normal de 3 a 4 años pa Santina ya Pantera ou'l primer premiu p'Alcoba, na sección 14 de femas de tipu normal de 5 a 6 años.

La meyor becerra del certame en tipu normal fui Sena II, d'Ángel Berdasco Rodríguez, de Fonceca, ya la vaca con cría tipu normal del certame fui pa Canela, d'Ana Isabel Llano Fernández, de Coubos. 

Na categoría de culón del certame fui escoyíu'l touru Avispado, de María del Carmen Rey López, de Tabladiel.lu. La meyor vaca fui Xana, de María Lidia Fernández Suárez, de Castru Sierra. María Lidia Fernández Suárez tamién conseguíu'l premiu al meyor lote corte en tipu culón. La meyor vaca con cría culona fui Primavera, de María Josefa Rodríguez Garrido, de Mieldes, ya la campeona na categoría de becerras fui Sofía, de Luisa Menéndez Rodríguez,  de Vil.lar de Bergame. María Luisa Menéndez Rodríguez tamién conseguíu'l premiu a la meyor xanta culona del certame con Reina.