Cangas del Narcea, 29 d'agostu de 2020. El Conceyu de Cangas del Narcea eichóu a andar yá los talleres de Muyer rural 2020, que van impartise, de manera itinerante, n'once pueblos del conceyu, ente'l 21 de setiembre ya'l 16 de los santos. "Los talleres tán destinaos a formar a las muyeres en materias qu'el.las mesmas demandan, dándo-ys a la vez un espaciu de participación social segura", sigún apuntóu la conceyala de Salú Pública, Igualdá, Muyer ya Drechos Sociales de Cangas, Carmen López.

Nesta edición van faese talleres con cupos reducíos, p'adaptase a la situación de la COVID-19, polo que vei ser obligatorio ir con máscara, guardar la distancia social ya usar xel hidroalcohólicu a la entrada ya a la salida de los talleres. Las inscripciones van poder fadese hasta'l 15 de setiembre na Axencia d'Igualdá d'Oportunidades de Cangas del Narcea ou nas asociaciones de muyeres ou vayan ponese los talleres.

Ente las temáticas que van tocase alcuéntrase la salú femenina, la importancia de la muyer cumo tresmisora de la cultura tradicional, la violencia de xéneru, la xestión emocional al traviés de la meditación ya'l yoga, la  necesidá de construir relaciones de bon tratu ya l'avieyamientu activu. Los talleres diferientes van impartise ente las 16 ya las 18 horas tódolos días de la sumana, empicipiando polos l.lunes en Cibuyu ya Veiga de Rengos, los martes en Carbachu, Cibea ya Vil.latexil, los miércoles en Robléu de Teinás ya Santiáu, los xueves en Bisuyu ya Tresmonte ya los vienres en Courias ya Auguera. A los talleres tamién van poder ir muyeres d'outros pueblos del conceyu.

Los talleres Muyer rural 2020 fainse en colaboración ente'l Conceyu de Cangas del Narcea, Solidaridad Intergeneracional, el Serviciu Públicu d'Empléu del Principáu d'Asturias, el Ministeriu de la Presidencia, Relaciones conas Cortes ya Igualdá ya'l Ministeriu de Trabayu, Migraciones ya Seguridá Social.