Durante'l mes de setiembre, concretamente ente los días 4 ya 11, las personas interesadas en matriculase na Escuela de Música del Conceyu Cangas poderán faelo na Casa la Cultura ¿Palaciu d'Oumaña¿.
Amás de la ufierta avezada: Música ya movimientu, L.linguaxe musical (personas adultas ya nenas/os), Pianu, Guitarra, Vigulín, Flauta, Clarinete, Trompeta, Saxofón, Guitarra eléctrica, Baxu eléctricu, Batería, Folclore: bail.le ya percusión; Gaita ya tambor, Curdión diatónica, Cantu pop-rock, Conxuntu instrumental ya Coru; ofrécense dúas modalidades nuevas: Ukelele ya Viola.
Cumo'l cursu pasáu, 2017-18,  la escoyeta de la especialidá instrumental poderá faese dende Música ya movimientu, a partir de los 4 años d'edá.

Outramiente, tódolos profesionales que conforman la plantilla de la propia escuela son especialistas nas asignaturas que ponen.

Con todos estos incentivos, naide debería arrenunciar a la súa pasión pola música... Así que, animádevos, tamos esperándovos.

La conceyala de Cultura, Carmen Riesco Combarro, considera esti cursu escolar nuevu un símbolu claru del compromisu del equipu de gobiernu cona cultura musical, que se materializa nel aumentu d'asignaturas ya na propia l.linia de trabayu, enfocada a promocionar el l.labor de la escuela mediante l'apertura a escenarios nuevos, que garanticen  la visibilización ya'l disfrute de la música dientro ya fuera de la propia escuela.