Cultura cierra l'añu d'actividades centrándose en 3 de los pilares principales del facer artísticu: teatru, cine ya música.

Nel ámbitu teatral, siguiráse cona programación teatral avezada de los miércoles no Teatru Toreno, a las 20 horas na programación destinada a públicu adultu ya a las 18 horas na programación destinada a públicu infantil. Ente las propuestas, que, cumo dicimos, recóin obras destinadas a públicu infantil ya adultu, sobresalen dúas orientadas a esti públicu último: Matanza, un espectáculu d'El Encuentro Teatro ya Ana Morán qu'aprovecha'l ritu ancestral de la matanza de los gochos pa falar de cuestiones d'índole más fonda, qu'atañen a los cambios sociales ya culturales no correr de los tiempos ya a cúmo afectan estos al ritu, la tradición ya'l mitu. El choque ente l'antigüedá ya la contemporaneidá en definitiva. Esta obra fui ganadora de los X Premios Oh! de las Artes Escénicas d'esta edición última nas categorías de Meyor autoría ou coreografía, Meyor intérprete femenina ya Meyor iluminación. A la par d'esta obra, xúntase outra propuesta igual d'atractiva, J'attendrai, de la compañía Con Ánimo de Lucro Teatro, que vei ser, sin dudalo, outru gran aciertu del director de la compañía, Jorge Moreno, que vuelve al Toreno una vez más espuéis de presentar l'añu pasáu la súa obra aclamada Sobremesa occidental.

No que correspuende a la música, las citas más reseñables son la del concursu de tonada yá tradicional, que se mantién los domingos no Toreno na súa programación quincenal ya la edición tercera de las xornadas de Música na basílica, que comprienden estilos musicales que van de la lírica al góspel, pasando por cuartetos de vientu ya cuerda acompañaos d'una tenor. Esta actividá celebraráse na Basílica de Santa María Madalena ente'l 2 ya'l 7 del mes muertu del 2019.

En cuanto al cine, la Cinemateca Ambulante siguirá ofreciendo cine alternativu de calidá na súa versión orixinal subtitulada, nesti tercer trimestre apuéstase polos trabayos cinematrográficos siguientes:  In memoriam, Hasta siempre, hijo mío; Enterrados, Lo que arde ya Parásitos.

A todo esto, hai que sumar tolas exposiciones que poderán disfrutase na Casa la Cultura "Palaciu d'Oumaña" nestos meses no sou horariu d'apertura, de 10 a 13:30 ya de 16 a 19:30.
    
En palabras del conceyal de Cultura, José María Carro, esta ufierta cultural pretende mantener ya reforzar la presencia cultural yá consolidada na vida canguesa, proponiendo actividades variadas ya atractivas qu'atiendan a obxectivos cuantitativos ya cualitativos. Apunta tamién el conceyal que las actividades comprienden el periodu comprendíu ente outubre ya'l 24 del mes muertu d'esti mesmu añu, porque a partir del día mencionáu la programación  yá será catalizada pola Navidá Cultural.