Cangas del Narcea, 27 d'agostu de 2020. La conceyala d'Obras del Conceyu de Cangas del Narcea, Laura Álvarez, visitóu güei pola mañena las obras de construcción del muru de sostenimientu de la carretera d'accesu a L'Acebu, a l'altura Rañeces. Unos trabayos que, na xornada de güei, consistían no asfaltáu de la vía,  "ta prácticamente acabada", dixo espuéis de la visita la responsable d'Obras, que recordóu que los trabayos p'arreglar el fundimientu, provocáu pola caída d'un árbol na vera izquierda de la carretera, "esixenon un proxectu técnicu complexu que requiríu un informe especializáu".

Estos trabayos fonon executaos pola empresa Souto Transportes Cibuyo S. L., que presentóu la meyor ufierta calidá-preciu ente las 18 empresas qu'optanon a la licitación. Fui adxudicada por un importe de 39.930 euros con impuestos incluíos.  "Güei vei poder abrise la carril cerrada ya meyorase'l pasu a tódalas personas que suben a L'Altu L'Acebu", dixo Álvarez, qu'apuntóu que yá s'instalóu un quitamiedos de seguridá de más de 30 metros. 

Los daños producíos pol temporal en 2018 esixenon un proxectu técnicu complexu, que requiríu faer l.labores de topografía, un informe xeolóxico-técnicu, amás d'un estudiu de la fana qu'obligóu a la contratación de la empresa especializada Incenersa.  No sou proxectu, especifícase que las obras consistienon na construcción d'un muru de sostenimientu d'hormigón armáu de 25 metros de l.largo por alzaos de 2, 50 metros d'alto ya un metru d'ancho sobre carriles clavaos de 6 metros de l.largo colocaos en forma triangular con una separación de 0, 60 metros de distancia, en dúas filas separadas de 0, 60 metros tamién.