Cangas del Narcea, 27 de los santos de 2020. El Conceyu de Cangas del Narcea, al traviés de la Conceyalía de Mediu Rural ya Agroganadería, decidíu aplazar pal añu qu'entra la Feria Ganadera de San Andrés, prevista pal 1 del mes muertu no recintu ferial de La Imera. La conceyala del aria, Ada Riesco, explicóu qu'esta suspensión faise "por responsabilidá énte la situación actual de pandemia" ya esclarióu que nun iba ser de recibu xuntar a decenas de personas del ámbitu de la ganadería nun recintu cuando se recomienda en toda Asturias nun ser más de seis personas.  

Riesco recordóu que la normativa iba permitir la súa celebración, "pero nun podemos arriesganos a tresmitir el virus d'unos pueblos a outros al traviés de las ganaderas/os", puntualizóu la conceyala, que piensa que la limitación de movimientos ía fundamental p'acabar cono virus. De todas formas, a xuiciu de Riesco, la economía del sector vei poder mantenese con ventas directas nas ganaderías diferientes al traviés del comerciu online. Nesta feria venían participando nestos años unas 200 cabezas de ganáu ya muitu públicu, al ser, dende antiguo, una feria señera, conecida tamién cumo "las matonas", porque se mercaban vacas pa la matanza ya tamién  las chamadas "de las trampas", por ser la época na que se pagaban rentas ya préstamos. 

La decisión d'aplazar la Feria de San Andrés ta avalada pol sector: "Que se suspenda esta feria ía normal ya mui necesario", aseguróu Fernando López Martínez, profesional de la ganadería, que destacóu los datos malos que ta deixando la pandemia, "dame pena que se suspenda, pero you creo qu'ía normal ya necesario, ente tódalas personas hemos l.luitar pa qu'esto acabe pronto ya poder salir sanos de todo esto". 

La conceyala quixo recordar tamién a las vecinas ya vecinos de los pueblos de Cangas la necesidá de cumplir la normativa a la hora de fader el samartín, tradicional nesta época del añu, porque nun ta permitío xuntase más de seis personas, "tenemos la obligación de cumplir las normas pa protexenos unos a outros, anque tamién entiendo que na mayoría de los casos ía imposible fadelo namás conas personas convivientes, sí hai que fader por reducilo a la xente cona que se ta normalmente ya, sobre todo, usando mázcara".