Cangas del Narcea, 3 del mes muertu de 2020. El Plenu del Conceyu Cangas aprobóu güei pola mañena por unanimidá una modificación de créditu p'ayudar a impulsar la plataforma de comerciu online "Apesa en casa", con una aportación de 4 000 euros, "p'apoyar el comerciu local", destacóu'l rexidor cangués, José Víctor Rodríguez, que recordóu qu'esta cuantía súmase a los 6 000 euros que recói'l conveniu firmáu enguano cona Asociación de Profesionales ya Empresarios del Suroccidente Asturianu (APESA). 

La web, www.apesaencasa.com,  que fui eichada a andar estiañu pol comerciu local, "supón una ventaya pa las personas que compran, que pueden recibir la compra en menos de 24 horas en casa". Esta ayuda permite paliar las restricciones d'horariu ya aforu al que tuvienon sometidas las empresas pequenas ya vei ayudar a instalar nesti marketplace módulos nuevos de meyoras pa la compra, bonos de reservas en sitios d'agospiu, bonos de compra pa comercios ya pidíos a domiciliu pa los restoranes asociaos. Amás, esta adenda vei permitir a APESA fader una campaña publicitaria de buzonéu que chegue a residentes na vil.la ya a vecinas ya vecinos de la zona rural, cono fin de promocionar los sous productos ya la plataforma, qu'ía, nun hai duda, un referente n'Asturias.  

L'alcalde adelantóu que pronto van anunciase ayudas nuevas pal sector turísticu ya pa la hostelería del conceyu, que siguen conos establecimientos ciarraos por culpa  las restricciones de la pandemia.

El Plenu tamién aprobóu de manera unánime una modificación de créditu de 500 euros pa l'asociación Narcea Solidaria, qu'ayuda de manera voluntaria nos Servicios Sociales, "son un colectivu que trabaya muito pol bien de las personas más necesitadas", apuntóu'l rexidor.