Cangas del Narcea, 9 de marzu de 2021. La Conceyalía de Cultura del Conceyu de Cangas del Narcea vei celebrar enguano la XIX edición de la Sumana Cultural cono títulu "Cultura y Arte en Cangas", edición que touvo que ser aplazada l'anu pasáu por culpa l'andancia. Durante la sumana, vamos poder disfrutar de conciertos, exposiciones, una charla-coloquiu ya teatru. "Queremos impulsar las disciplinas artísticas diferientes", manifestóu'l conceyal de Cultura, José María Álvarez Carro, qu'explicóu que " puede disfrutase de la cultura de manera segura cumpliendo conos protocolos sanitarios". Pa fadelo, implantóuse un sistema d'entradas que yá pueden garrase na Casa la Cultura "Palaciu d'Oumaña".

La XIX Sumana Cultural vei empicipiar el l.lunes 22 de marzu a las 19.30 horas cona inauguración de la exposición conxunta de dous harmanos cangueses baxo'l títulu "Lugares comunes: Amaya y Federico Granell" ya vei poder visitase hasta'l 5 d'abril na Sala d'Exposiciones. La presentación, a cargu de José Ramón Puerto,  vei cuntar cona participación de Federico. El restu de la sumana, la cita diaria vei tresladase al Teatru Toreno, a las 19:30 horas. El martes  23 de marzu haberá una lectura dramatizada sobre los textos del cangués Alejandro Casona feita por Jaleo Producciones. Los conciertos, que van ser el puntu fuerte d'esta sumana, van empicipiar el miércoles 24 de marzu con "La vuelta al mundo en cuatro guitarras", que vei interpretar el cuartetu Entrequatre. El xueves 25 de marzu vei ser el turnu de Silvia Quesada, maestra en Cangas del Narcea, que vei subise al escenariu cono sou grupu A Mansalva, pa interpretar los cantares del sou discu nuevu "Prefiero ver llover". El vienres 26 de marzu chegará la charla coloquiu del director de cine cangués Juan Gama de Cosío, baxo'l títulu "De la publicidá a la ficción: un recorríu personal pola comunicación audiovisual". El cierre d'esta edición vei correr a cargu de la cantautora canguesa Tania Pereira, que cona súa nominación reciente a los premios AMAS, vei subise'l sábadu  27 de marzu al escenariu del Toreno pa volver a fadenos disfrutar cona súa música.

El cartel qu'anuncia las xornadas vuelve tar deseñáu un anu más pol artista local Ernesto García del Castillo "Neto". Nél puede vese a vecinas ya vecinos yendo a la Casa de Cultura del Conceyu. 

Durante tódalas actividades vei siguise'l protocolu sanitariu establecíu pola COVID-19.