Cangas del Narcea, 22 d'outubre de 2020. L'alcalde cangués, José Víctor Rodríguez, solicitóu güei a la conseyera de Drechos Sociales ya Bienestar, Melania Álvarez, la puesta en marcha del Equipu d'Intervención Técnica d'Apoyu a la Familia (EITAF). Una solicitú que touvo una respuesta positiva por parte del gobiernu del Principáu, que quier eichar a andar esti equipu no 2021, prestando serviciu a tol Aria Sanitaria II. 

Esti equipu vei cuntar con dúas/dous profesionales, un/a psicólogu/a ya un/a trabayador/a  social ou educador/a, que van asegurar el bienestar de los nenos, las nenas ya las/los adolescentes na zona, amás de satisfader las súas necesidades básicas. L'equipu nuevu vei tener el sou centru base na capital canguesa, "ía un serviciu fundamental pa prestar protección a las ya los menores d'edá de toda la zona ya era una reivindicación histórica del Suroccidente", aseguróu l'alcalde cangués. 

Esti serviciu súmase al del Equipu de Terapia ya Orientación Familiar (ETOF), que fui adxudicáu a la empresa Trama ya cunta na actualidá con dous profesionales. Rodríguez tresmitíu a la conseyera el sou desalcuerdu con que l'adxudicación nueva namás contemple la contratación d'un/a psicólogu/a. Con todo, EITAF vei reforzar l'atención a familias, nenas/os ya adolescentes de cara al 2021, pero'l Conceyu Cangas considera que la meyor manera de prestar esti serviciu era manteniendo los dous puestos del equipu del ETOF, xunto conos nuevos del EITAF. 

El gobiernu cangués vei apostar siempre por reforzar ya ampliar servicios tan básicos pa la población cumo Servicios Sociales, por eso, consiguir dúas/dous profesionales nesti aria significa xenerar empléu ya meyorar l'atención a quien más lo necesitan nunos momentos de pandemia mundial.