Cangas del Narcea, 5 de los santos de 2020. L'alcalde de Cangas, José Víctor Rodríguez, firmóu güei pola mañena'l conveniu añal cona Xunta d'Hostelería de Cangas, que contempla una ayuda de 19 000 euros. Con esta subvención, los hosteleros van poder financiar hasta'l 75 % de las actividades, debiendo fader la propia asociación una aportación de polo menos el 25 %. Trátase d'actividades cumo las Xornadas Gastronómicas de la Caza ya'l Vinu ou l'Antroidu, que, nun hai duda, ayudanon a dinamizar la vida na vil.la canguesa nesti atípicu 2020.

El conveniu recói esta vez que las personas vinculadas al ámbitu de la hostelería van poder invertir los cuartos de las actividades que nun pudieran fader pola crisis sanitaria de la COVID-19 en material que favoreza los hábitos d'hixene: xabón, desinfestante de manos, toballas de papel ya desinfestantes, pañuelos de papel, mázcaras ou cartelería. Amás, vei poder invertise la subvención en vidios que contengan conductas que prevengan la propagación del virus ou na compra de calefactores ou carpas que permitan mantener las terrazas abiertas durante l'hibiernu.  

"Permiti-ys invertir parte de la subvención en materiales pa desinfestar ía una ayuda pa frenar el virus que nos beneficia a todos/as", explicóu espuéis de firmar l'alcalde, José Víctor Rodríguez, que fui al actu acompañáu de la teniente alcalde, Laura Álvarez. Pola súa parte, el presidente de la Xunta d'Hostelería del Conceyu, José Manuel García, dixo que "el conveniu permítenos comprar xeles pa l.luitar contra'l COVID estiañu", tamién aprovechóu pa manifestar el sou descontentu pa conas mididas adoptadas pol Principáu. 

El rexidor mostróu'l sou apoyu a las personas del ámbitu de la hostelería, obligadas a ciarrar durante quince días, tamién recordóu que'l Conceyu siempre apoyóu al sector nesta crisis, con mididas cumo l'ampliación del espaciu de las terrazas, la posibilidá de que los espacios d'ociu nocturnu abrieran cumo caferías pol día, la bonificación del 90 % de la tasa de las terrazas, las ayudas del cheque d'impulsu empresarial, cono 80 % de los pagos feitos, ou la exención pa que nun tuvieran que pagar alcantarilláu, augua ou basura espuéis de declarase suxetos pasivos, tasas que tamién van eliminase durante esti ciarru. 

Durante la firma, l'alcalde recordóu que las personas del ámbitu empresarial de la hostelería ya'l comerciu fonon fundamentales durante la primer ola de la pandemia, ou l.levanon comida al personal sanitariu ya puxenon telas a disposición pa fader mázcaras, por eso, propuxo que "tódolos días eichemos nun bote lo que gastaríamos si fósemos a consumir nestos quince días de ciarru ya, cuando reabran, séamos responsables cumo lo fonon el.los", recalcóu l'alcalde animando a consumir no comerciu ya na hostelería de Cangas.