Cangas del Narcea, 16 d'abril de 2021. El Conceyu de Cangas emitíu güei pola mañena un bandu, cono obxectivu d'informar a las vecinas ya los vecinos de las obras p'arreglar el firme del traxectu ente l'hespital ya la Plaza d'Asturias a partir del l.lunes 19 d'abril na AS-213. "Trátase d'una obra mui demandada", recordóu l'alcalde, que pide no bandu que nun s'aparque los coches nos días nos que van fadese los trabayos. 

Las obras van fadese pola nueite, a partir de las 22 horas, "sabemos que van suponer molestias a las vecinas ya los vecinos, pero obviamente los ruíos nun van tar siempre debaxo de la mesma ventana", avanzóu l'alcalde, que pidíu un pouquenín de paciencia, "la idea ía fader la obra por tramos, pa que tamién se vaya aglomerando, lo que vei suponer que debaxo de cada ventana se trabaye cumo muito dúas nueites siguidas". Rodríguez solicitóu a las vecinas ya los vecinos que faigan un esfuerzu ya compriendan que "ía una obra necesaria ya mui demandada". El rexidor tamién solicitóu que durante los días de la obra, las vecinas ya los vecinos reduzan al máximu la basura, que van poder deixar nos contenedores asitiaos sobre las aceras ou n'outros puntos de la vil.la cuando nun sea posible poner el contenedor na zona peonil.

Los trabayos van fadese ente'l 19 ya'l 30 d'abril cono plan de trabayu siguiente:

•  Hespital-Muséu del Vinu, del 19 al 21 d'abril
• Accesu al Muséu del Vinu-c/ Pelayo, del 21 al 23 d'abril
• c/Pelayo-Avenida de L'Acebu, días 23, 26 ya 27 d'abril
• Avenida de L'Acebu -principiu AS-213, del 27 al 28 d'abril
•  Intersección AS-213 cona AS-15 na Plaza d'Asturias, del 28 al 30 d'abril

Son trabayos que salienon a licitación por un importe de 219 896, 27 (266 074, 49 IVA incluíu) ya que fuenon adxudicaos a la empresa Alvargonzález Contratas, que vei meyorar el pisu d'esta vía, que ta en mui mal estáu.