Cangas del Narcea, 27 de xunu de 2020. El Conceyu de Cangas del Narcea colocóu no balcón de la Casa Conceyu l'arcu la vieya pa conmemorar el Día Internacional del Arguyu Gay, que se celebra cada 28 de xunu. La enseña cubre todu'l balcón principal de la fachada del palaciu de los Condes de Torenu, sede de la Casa Conceyu, baxo la mirada atenta de las banderas d'Europa, España ya Asturias: "yía un xestu pa faer frente a la intolerancia que sufre'l colectivu de lesbianas, gays, transexuales, bisexuales, intersexuales ya queer", dixo l'alcalde, José Víctor Rodríguez.

El rexidor explicóu que la insignia cumple cona decisión del Tribunal Supremu, que prohibíu colocar cualquier bandera non oficial na fachada de las Casas Conceyu, "nun se trata d'una bandera, yía un arcu la vieya que reivindica los drechos d'un colectivu ya ha tar nun sitiu visible, cumo la casa de tódalas/tódolos vecinas/vecinos".

Rodríguez quixo condenar los actos vandálicos sufríos nos bancos cono arcu la vieya de Llangréu: "nun puede consintise en plenu sieglu XXI, ou ha primar la l.libertá ya la diversidá". El rexidor tamién anuncióu que, el martes que vien, el plenu del Conceyu vei debatir de manera telemática l'eslogan "2020, muyeres LTB: sororidá ya feminismu", cono obxectivu de l.luitar pola igualdá d'esti colectivu".