Cangas del Narcea, 11 de santamarina de 2022. El Conceyu de Cangas del Narcea, al traviés del Serviciu de Normalización Ḷḷingüística, recuerda que tán a disposición las bases del XX Concursu de Cuentos Curtios del conceyu Cangas, dotáu con dous premios de 500 euros, unu pal meyor relatu escritu na variedá occidental del asturianu ya outru pal meyor cuentu escritu na variedá normativa. Los relatos van poder presentase hasta'l 31 de santamarina na oficina del Serviciu de Normalización Ḷḷingüística, yá sea de manera presencial ou por corréu certificáu na mesma dirección nun sobre sin remite. Los relatos han tar firmaos por un pseudónimu ya axuntar una plica conos datos reales del autor.

La temática del concursu vei ser ḷḷibre ya las obras inéditas, con una extensión mínima de cinco fueas ya una máxima de venti, presentadas a espaciu doble en formatu DIN A4. Los cuentos van ser valoraos por un xuráu compuestu pol conceyal de Cultura de Cangas del Narcea, la responsable del Serviciu de Normalización Ḷḷingüística, un/a representante de la Rede de Normalización Ḷḷingüística, amás de docentes ya escritoras/es en ḷḷingua asturiana. El xuráu vei comunicar el sou determín por vía telefónica ou corréu electrónicu.