Cangas del Narcea, 13 d'agostu de 2020. La conceyala d'Educación de Cangas del Narcea, Esther Fernández Somiedo, mandóu güei pola mañena una carta a la conseyera d'Educación, Carmen Suárez, na que pide que se cubra'l tresporte escolar d'una docena de nenas ya nenos del conceyu. Trátase de cinco rutas con peculiaridades diferientes, la primera fai referencia a la escuela de L.lamera, perteneciente al CRA "Río Cibea", a la que vei una nena de trés años con casa a menos de 1, 5 kilómetros del centru educativu,  <<por lei nun tendría drechu a tresporte, pero hai que tener en cuenta las peculiaridades de la zona>>, explicóu la edil, qu'argumentóu que <<ía una zona d'alta montaña, ensin l.luz, ensin aceras nin arcenes>>, al tiempu qu'añidíu qu'ir andando n'hibiernu a la escuela ía mui duro. Fernández Somiedo recordóu a Suárez el compromisu alquiríu na súa visita última el mes pasáu de febreiru, onde anuncióu qu'iba dotase de tresporte a los menores que vivieran cerca los centros. 

N'El Pontón una familia con dous nenos tamién tien qu'ir andando a la escuela de L.lumés, <<quedan fuera del tresporte por namás 200 metros>>, apuntóu la conceyala, que defende que'l Principáu ha tener en cuenta las peculiaridades de la zona rural. Outra de las rutas que la responsable d'Educación reclama a la Conseyería yía la que xunta la carretera del d'El Cotu cona escuela pública d'Oubanca. Afecta a un total de trés nenos, <<que tán cursando la enseñanza obligatoria>>, recalcóu la edil, qu'explicóu que, anque'l sou centru de referencia fora'l CRA Santana, en La Riela, <<los nenos van a Oubanca pa que las familias puedan conciliar, porque nesti centru hai comedor escolar>>. Por todo esto, la conceyala piensa qu'ía necesario que la Conseyería reestructure'l serviciu de tresporte.

Las outras dúas rutas que'l Conceyu quier que la Conseyería eiche a andar son la de Cibuyu cona escuela de Veiga de Rengos, qu'afecta a cinco alumnos, ya la ruta que tresladaría a un alumnu dende El Pumar hasta la escuela d'Oubanca. <<Que la Conseyería se fixera cargu del tresporte sería un síntoma claru de qu'apuesta pol mediu rural>>, dixo la conceyala, que piensa qu'hai que tener en cunta las peculiaridades de cadagunu de los casos.