Cangas del Narcea, 3 d'agostu de 2020. El Conceyu Cangas solicitóu una regunión cona Dirección Xeneral de Mediu Natural pa buscar una solución a la plaga de ratas toupu que tolos años merma la producción de yerba nos pastizales asitiaos ente la sierra de L'Acebu ya Xinestosu.

La conceyala de Mediu Rural ya Agroganadería de Cangas del Narcea, Ada Riesco, piensa que <<la Conseyería tien que tomar mididas que faigan por erradicar el problema, que ta fadiendo perder el 50 % de la yerba a la xente dedicada a la ganadería>>.

Pola súa parte, el Conceyu Cangas vei delimitar la superficie afectada pola rata toupu, pa faelo, las personas afectadas han acudir a las dependencias de la Casa Conceyu pa siñalar no mapa los terrenos afectaos,  <<el documentu final vamos mandalu a la Conseyería>>, explicóu Riesco, que piensa qu'esti planu <<vei ser una ferramienta bien bona de trabayu>>. Esti documentu, que vei faese nesti mes qu'entra, vei aídar a definir las mididas que pueda tomar el Principáu, al conecese de primera mano las superficies afectadas.  La conceyala vei solicitar al Principáu que declare de manera oficial esta plaga, tal ya cumo feixo no 2017,  <<pa que pueda aplicar el programa nacional de control de plagas qu'establez el Real Decretu 409/2008>>.

Riesco ve necesario que las personas afectadas  <<reciban dalgún tipu d'aída que compense las pérdidas que tuvienon estiañu>> ya, sobre todo, controlar a estos animales usando técnicas diferientes, qu'inclúin aves rapaces,  l.labrar las tierras ou usar fosfatu d'aluminiu,  <<son técnicas eficaces, con un coste qu'haberá fese con cargu al programa nacional de control de plagas>>, recalcóu Riesco. Amás, pidíu que la xente del aria nun se vea perxudicada a la hora de recibir aídas europeas de la Política Agraria Común (PAC).

 <<Hai que parar esta plaga, si non, vei siguir extendiéndose ya puede afectar a outras producciones cumo güertas ou viñas >>, apuntóu la edil, qu'aseguróu qu'acabar con esti problema <<convertíuse nunu de los asuntos prioritarios de la mía conceyalía>>, dixo Riesco, que recordóu que'l sou predecesor no cargu, Aurelio Linde, yá tuviera varias reguniones no Principáu pa dar solución a esti asuntu.