CANGAS DEL NARCEA PRESENTA UN VIDIU NUEVU CONO QUE PRETENDE ATRAER TURISTAS NA SERONDA - ayto-cangasdelnarcea
CANGAS DEL NARCEA PRESENTA UN VIDIU NUEVU CONO QUE PRETENDE ATRAER TURISTAS NA SERONDA
Cangas del Narcea, 30 de setiembre de 2020. El Conceyu de Cangas presentóu güei pola mañena un vidiu promocional del conceyu cumo destín turísticu. Trátase d'una reproducción de 90 minutos na que se ponen el valor los recursos turísticos del conceyu: patrimoniu, gastronomía, deporte, naturaleza, ecoturismu ou enoloxía. No vidiu, puede vese cumo una fía cunta las experiencias vividas a una madre: <<Esto ía meyor que nas fotos>>, di la rapacina mediante una voz n'off. Nas imáxenes aparecen sitios cargaos d'historia, las viñas conas que se fain los vinos DOP de Cangas ou paisaxes únicos cumo'l de la Reserva Integral de Muniel.los, nos que puede <<sentise l.libertá>>.
Esti vidiu promocional destaca'l potencial de Cangas, <<l'Asturias pa descubrir>>, con paisaxes inmensos, pueblos con vida ou montañas habitadas pol osu pardu, un recursu que fai d'esti conceyu un sitiu particular. Amás, fálase tamién de la gastronomía ou los kilómetros de carreteras conos que se cunta a la hora de fader rutas de dúas ruedas, tanto en motu cumo en bicicleta. La moza que cunta las súas experiencias a súa madre deixa claro que la súa visita al conceyu <<ta siendo increíble>>, algo que queda patente nas imáxenes, ou se fomentan las ganas de venir tanto de la coprotagonista cumo de las personas destinatarias del anunciu.
L'obxectivu d'esti vidiu yía desestacionalizar el turismu ya consiguir que la xente visite Cangas na seronda. Nesti sentíu, promocionaráse en canales de televisión d'Asturias, Cantabria, País Vasco ya Castía, amás d'en cuñas de varias emisoras de radio durante'l mes d'outubre. Tamién se fixenon seis vidios curtios más, de 30 s cadagunu, nel.los promociónase de manera individualizada'l patrimoniu, la gastronomía, el deporte, la naturaleza, l'ecoturismu ya la enoloxía.
El vidiu fui presentáu na ilesia de San Xuan Bautista del Monesteriu de Courias pola conceyala de Turismu, Begoña Cueto; l'alcalde de Cangas del Narcea, José Víctor Rodríguez; ya la propia viceconseyera de Turismu del Principáu d'Asturias, Graciela Blanco, que quedóu encantada cono resultáu: un vidiu ou se muestra'l conceyu cumo un sitiu seguru, con paisaxes increíbles ya muita variedá d'experiencias que fain de Cangas un territoriu de visita obligada.
Visitantes
La Oficina de Turismu de Cangas del Narcea subíu nun 5 % el númaru de visitas esti branu. En total, incluyendo los meses de santamarina, agostu ya setiembre, recibiemos a 4 730 personas, un datu superior al añu pasáu, cuando la cifra total no mesmu periodu fui de 4 507 turistas. A esti respectu, destaca'l bon datu de santamarina, que superóu en 456 el númaru de personas interesadas na información turística.
El Muséu del Vinu recibíu ente santamarina, agostu ya setiembre 1 025 visitas, un datu mui similar al del mesmu periodu de 2019, cuando chegóu a las 1 153 personas. Esti descensu pequenu débese fundamentalmente a la falta de grupos organizaos ya a las restricciones d'aforu durante las visitas guiadas, que s'implantanon con motivu de la pandemia. Pesie a todo, el turista mostróuse interesáu en conecer cúmo se fai'l vinu artesanal de Cangas.
Pola súa parte, el Centru de Recepción de Visitantes Alejandro Casona, en Bisuyu, alcanzóu estiañu las 241 personas, un datu mui positivu que se consiguíu nun mes ya mediu, porque'l centru abríu las súas puertas el 17 d'agostu, de feitu, en setiembre experimentóu una subida del 76 % respectu al mesmu mes del añu anterior, pasando de los 37 visitantes en 2019 a los 154 hasta'l pasáu 28 de setiembre. Cangas del Narcea mantouvo, amás, el númaru de visitantes que s'acercanon a los centros turísticos diferientes del conceyu. En total, recibíu la visita durante los meses de santamarina ya agostu de 9 596 personas frente a las 10 879 del branu pasáu.
En cuanto a los datos d'ocupación, no turismu rural de Cangas, subíuse estiañu nun 15 %, pasándose d'una ocupación media d'un 70 % en 2019 a una del 85 % el branu pasáu. Estos datos rondan el 100 % cuando falamos d'agostu, ou los sitios d'agospiamientu tuvienon prácticamente completos ya con estancias más duraderas qu'outros años.