Cangas del Narcea, 16 de setiembre de 2020. El Conceyu de Cangas del Narcea vei volver a los certámenes de ganáu no recintu ferial de La Imera,  suspendíos por culpa de la pandemia. Dende la Conceyalía de Mediu Rural ya Agroganadería, infórmase de que van retomase las ferias de San Mateo, el 22 de setiembre, ya San Andrés, el 1 del mes muertu. Tamién vei recuperase la XXXV Muestra de Raza Asturiana de los Val.les del Conceyu Cangas, que vei celebrase los días 2, 3 ya 4 d'outubre. 

"Van celebrase con presencia exclusiva de profesionales", explicóu la conceyala de Mediu Rural ya Agroganadería de Cangas, Ada Riesco, qu'incidíu na importancia de la prevención: "van siguise tolas mididas de continxencia necesarias pa evitar riesgos sanitarios". La edil quixo matizar, amás, que la celebración d'estos certámenes sigue supeditada a la situación epidemiolóxica del momentu, "nun vamos dudar en suspender las actividades si el riesgu de tresmisión comunitaria aumenta", dixo de manera contundente.

Funcionamientu

Las ya los profesionales han cuntar con un CEA activu que-ys permita participar, inscribiéndose anantes, no certame. Durante l'eventu, las ganaderías van tar separadas ente sí 1 m 50 cm. El circuitu establecíu vei tener una dirección única, cona finalidá d'evitar cruces ente personas, amás, l'accesu a los cuartos de bañu del recintu limitaráse a una persona de cada vez ya las instalaciones van ser desinfestadas cada 90 minutos. P'acceder a los certámenes, vei ser obligatorio usar mázcara, tomar la temperatura ya desinfestar las manos con xel hidroalcohólicu. Las personas participantes han aportar amás una declaración xurada na que se faiga constar que nun tienen síntomas ya que nun tuvienon contactu con niuna persona positiva. Ta previsto tamién fader un rexistru de participantes, pa tener un control d'asistencia en casu de que surdiera dalguna incidencia.

El recintu ferial vei permanecer esos días ciarráu al públicu ya'l bar namás vei poder ser usáu polos ya polas profesionales del sector na zona de la terraza, restrixiráse l'accesu a la zona interior pa evitar aglomeraciones. Igualmente, limitaráse a díaz el númaru de cabezas de ganáu presentadas por cada ganadería ya a cuatro el númaru de personas encargadas d'atendelas. Tamién vei designáse-ys una mesa d'usu exclusivu pa cadaguna de las 30 ganaderías inscritas.