Cangas del Narcea, 17 de xunu de 2020. El Conceyu de Cangas del Narcea sacóu a licitación pa los dous años vinientes la contratación del serviciu de recepción, control, mantenimientu ya  l.limpieza de las instalaciones del polideportivu ya la piscina climatizada del Conceyu por un importe de 280.667, 20 euros ensin IVA, 339.607, 31 euros con impuestos incluíos. El contratu inclúi la l.limpieza de las instalaciones durante 6.184 horas nos dous años próximos, l'atención al públicu na conserxería durante 8.620 horas ya'l mantenimientu durante 4.160 horas.

El conceyal de Deportes, Sergio Boto, cree que la unificación d'estos contratos, que, hasta la fecha, adxudicábanse por separao: "fain más atractivu'l serviciu, lo que xenera mayor competitividá ente las empresas". Hasta la fecha, sacábanse a concursu trés contratos diferientes, unu pa la piscina, outru pal polideportivu ya un últimu pa la l.limpieza de las pistas exteriores, qu'agora unifícanse nunu solu que vei a "meyorar los servicios ya unificar los protocolos nos servicios deportivos", apuntóu l'edil. El contratu tien una duración de dous años, con posibilidá de prórroga d'outros dous. 

La empresa adxudicataria haberá prestar serviciu de recepción ya control d'accesu tanto a la piscina cumo al polideportivu, amás, vei tener que fer l.labores de mantenimientu en tolas instalaciones ya l.limpialas, incluyendo, nesti sentíu, una máquina automática pa fregar la pista principal del polideportivu ya un robot l.limpiafondos pa los vasos de la piscina. Tamién haberá fese cargu de la l.limpieza de las pistas exteriores, qu'hasta la fecha taban contratadas de manera independiente. La empresa adxudicataria vei disponer del personal necesariu pa dar las prestaciones del contratu, abonando las súas retribuciones al personal cumpliendo cono conveniu colectivu. Amás, el personal encargáu del mantenimientu de la piscina ha cuntar cono títulu de Mantenimientu de piscinas d'usu colectivu, englobáu na categoría cuarta cumo oficial de 1ª d'oficios varios (mantenimientu).

Las empresas interesadas van poder presentar las súas ufiertas hasta'l 10 de santamarina nas oficinas del Conceyu Cangas.