CANGAS DEL NARCEA, POSICIÓN SEGUNDA NO CONCURSU CAPITAL DEL TURISMU RURAL 2019 - ayto-cangasdelnarcea
CANGAS DEL NARCEA, POSICIÓN SEGUNDA NO CONCURSU CAPITAL DEL TURISMU RURAL 2019
El concursu Capital del Turismu Rural organizáu pol portal líder del sector Escapada Rural cona finalidá de buscar el pueblu español más atractivu pa la práctica d'esti tipu de turismu cumple la súa edición tercera. La iniciativa consolídase con éxitu aumentando la participación ya xenerando un dinamismu grande no sector.
Un total de 215 candidaturas de 15 comunidades autónomas competían por ostentar la capitalidá del Turismu Rural n'España. D'ente todas estas candidaturas, un xuráu profesional escoyíu 10 finalistas ya Cangas del Narcea fui una d'el.las, xunto con Almagro, Buñol, La Hiruela, Mont Blanc, Navaluega, Parada de Sil, Setenil de las Bodegas ya Trujillo.
La votación popular decidiría quién daría'l relevu a Ainsa ya Sigüenza, pueblos ganadores en 2018 ya 2017, respectivamente.
El pueblu ganador d'esta edición tercera fui Santillana del Mar (Cantabria). Cangas del Narcea quedóu na posición segunda con un total de 7444 apoyos, que suponen un 15,23 % de los votos, siendo'l pueblu únicu d'Asturias ente los finalistas.
Los actos ya la ceremonia d'entrega de los galardones fixénonse'l fin de sumana pasáu en Santillana del Mar.
Empicipianon el vienres 27, coincidiendo cono Día Internacional del Turismu, cona recepción ya la presentación de las candidaturas finalistas no Muséu Diocesanu. Nel actu promocionánonse la diversidá de productos del país asociaos al mundu rural de los díaz pueblos finalistas. Cangas del Narcea acudíu cono vinu ya'l miel cumo productos diferenciadores, cortesía de Bodegas VidAs ya miel El Tío Ángel.
En representación de la candidatura asturiana, acudíu Begoña Cueto Blanco, conceyala de Turismu del Conceyu de Cangas del Narcea, qu'explicóu que chegar a ser finalistas yá un gran trunfu ya consiguir el puestu segundu un premiu de gran importancia. Begoña explicóu qu'estas iniciativas contribúin a dar visibilidá al territoriu, onde'l turismu, pol sou carácter tresversal, yá un sector fundamental pal desenvolvimientu económicu, qu'amás contribúi a frenar el despoblamientu ya destacóu la importancia de compartir opiniones, inquietudes ya intercambiar experiencias con outros territorios de la península pa identificar problemas ya articular soluciones nas zonas rurales.
El sábadu 28 pola mañena, no Muséu d'Altamira, expuxénonse las conclusiones del Think Tank que se feixo pola mañena'l vienres ya nel que participanon expertos en turismu ya desenvolvimientu rural. Los representantes de las candidaturas finalistas diferientes, amás del grupu d'expertos, firmanon espuéis de la regunión de trabayu un manifiestu que recói un decálogu d'acciones pa la l.luita contra'l despoblamientu nas zonas rurales.
La entrega de galardones, tanto a los pueblos finalistas cumo al ganador, féixose na Plaza Mayor de Santillana del Mar, cona presencia de la Directora Xeneral de Turismu de Cantabria, Eva Bartolomé, ya la escritora María Oruña, madrina de la candidatura cántabra que fui la vencedora.
Begoña Cueto, representante de la candidatura asturiana, recibíu'l galardón de las manos d'Ana Alonso, directora de Comunicación ya Relaciones Institucionales d'Escapa Rural.