La Comisión de Fiestas de Cangas del Narcea (COFECA) decidíu suspender las fiestas del Carme ya la Madalena, que se celebran ente'l 14 ya'l 22 de santamarina. Una decisión que se tomóu anueite pola tarde ya na que las personas que forman parte de la comisión decidienon anular los actos festivos. "Ía una cuestión de responsabilidá", dixo la presidenta de COFECA ya conceyala de Fiestas, Laura Álvarez, quien nun ve viable celebrar actos multitudinarios en plena crisis sanitaria.

La conceyala explicóu qu'a l'anulación de las verbenas ya del desfile de peñas, anunciada hai yá unas sumanas, hai que sumar la cancelación de la romería d'El Prau del Molín ya la nueite rock, que tradicionalmente organiza la peña Barriga Hubiera. "Nun vei haber tiradas de las peñas nin Carme infantil nin tampouco conciertos", explicóu Álvarez al salir de la regunión. Tampouco van tocar las charangas nin vei celebrase'l pregón cono qu'arrancaban las fiestas, que congregaba a decenas de personas na plaza de la Casa Conceyu. "Quedan anulaos tolos actos que tradicionalmente se celebran nas fiestas", apuntóu la edil. Na regunión deixóuse claro que celebrar cualquiera de los actos festivos podería suponer un peligru de rebrote del coronavirus.  

El contratu que'l Conceyu tenía firmáu conas orquestas pa enguano rondaba los 45.000 euros ya pretendía incluyir orquestas de bon nivel cumo Assia, Charleston, Waykas, Panamá ou Tekila, ente outros. El consistoriu yá ta trabayando nas fiestas de 2021, nas que pretende cuntase con un cartel inmeyorable. Pola súa parte, el Conceyu nun vei tramitar nesti añu los planes de seguridá ya emerxencia que se fadían tolos años con motivu de las fiestas.