"Agostu baxo las estrel.las" avéiranos nas tardes-nueites de los xueves, vienres ya sábados a música ya cine pa públicu infantil ya adultu. Trátase d'actividades pa tódolos públicos conas qu'ofrecer una alternativa cultural ya d'ociu tanto pa la ciudadanía canguesa cumo  pa la visitante. Con esta iniciativa ya la presa d'El Prau del Molín auméntase la ufierta ya tamién l'afluencia de xente a la vil.la onde, tradicionalmente durante esti mes, l'actividá era inexistente.

Esti yá'l tercer añu nel que van facese estas actividades que, en palabras de José María Álvarez Carro, conceyal de Cultura: "completan la ufierta dientro la vil.la: veis a la presa, cenas algo nos restoranes ou consumes algo nos bares mientras los nenos tán nel cine ou fais tiempu pa la sesión d'adultos".

Pola súa parte, Begoña Cueto, conceyala de Turismu manifiesta que "la música ambienta las cal.les animando a la xente a tar más tiempu tomando algo ya disfrutando, amás d'animar al turismu a que visite'l nuesu conceyu". 

La actividades repártense n'espacios diferientes de la vil.la (patiu de la Casa Conceyu, anfiteatru d'El Fuexu, plazas ya cal.les diferientes), intentando  dinamizar el texíu económicu ya la ufierta cultural ya d'ociu cona proxección d'un total de nueve películas, la representación d'un cuentacuentos ya seis conciertos. Los xueves yá'l día escoyíu pa que los más pequenos disfruten del cine ya d'un cuentacuentos a cargu de Pilocha Lunares; los vienres yá'l momentu del cine p'adultos ya'l sábadu'l de la música. 

Documentos

Díptico con toda la programación