No sou añu segundu d'andadura, Cangas ya... acción! nun deixa d'acumular éxitos ya progresar no sou intentu d'incentivar la vida cultural canguesa, esta vez, al revulsivu que supón en sí mesmu'l concursu, súmase-y un complementu. Amás de la gala d'entrega de premios, Cangas tendrá la oportunidá d'afondar no mundu del cine al traviés d'una charla a cargu del cineasta asturianu Tom Fernández, que nos visitará'l xueves 12 d'abril, a las 20:00 horas, nel Auditoriu de la Casa la Cultura, pa falanos de cine.
Tom Fernández yá un escritor, guionista ya director de cine asturianu que cunta con una traxectoria l.larga no ámbitu audiovisual nas súas facetas creativas diferientes. Cumo guionista, trabayóu pa Globomedia na serie Siete vidas; cumo director, cunta con éxitos cinematográficos recientes cumo La torre de Suso ou  ¿Para qué sirve un oso? ou documentales tan vinculaos al entornu asturianu cumo Trashumancia.
    
Outramiente ya tal cumo apunta Carmen Riesco, conceyala de Cultura, del éxitu d'esti concursu, da cuenta la participación alta. Na convocatoria d'estiañu participanon 11 curtios:  Atrapada, El concurso, Soñando en cajalata, Perdido, Toc, toc; ¿Tendrán vida?, Los súper Josúas, Terror en casa Choldian, Lego Star Wars. The force awakens, La trampilla, Ponme una Mahou.

La edil añade, amás, que yá una oportunidá inspiradora pal desenvolvimientu de las inquietudes cinematográficas en Cangas, patentes no nivel altu de participación aludíu, cuntar cona presencia d'un director asturianu reconocíu ya anima a la sociedá canguesa a aprovechar la súa charla p'afondar na materia ya a disfrutar de la gala d'entrega de premios el vienres no Teatru Toreno, porque van asegurase un bon momentu.