El motivu d'esta comunicación yía davos a conocer que, a raíz de las queimas sufridas no conceyu de Cangas del Narcea no mes muertu, el Conceyu Cangas puxo a disposición una Oficina d'Atención a la Ciudadanía por Situación de Naturaleza Catastrófica. 

Esta oficina asítiase na Oficina Técnica de la Casa Conceyu. Nel.la van davos información sobre las ayudas que'l Plenu aprobóu na sesión de 20 de xineiru ya coordinar las solicitudes que se manden a l'alministración del Principáu ya a la del estáu, cono obxectu de faese con subvenciones que compensen los daños económicos sufríos.

A esti efectu, haberá dous tipos de solicitudes:

• La dirixida a la Delegación del Gobiernu cono obxectivu de solicitar una subvención derivada de la situación d'emerxencia, al amparu del Decretu Rial 307/2005. Esta solicitú vei tener por fin compensar los daños materiales en casas, bienes ya/ou aquel.los establecimientos industriales, comerciales ya de servicios dañaos polos feitos derivaos de la situación d'emerxencia. 

Fecha límite: 4 de febreiru de 2016.

• Al Conceyu de Cangas del Narcea, cona finalidá de faer un rexistru internu de tolos bienes particulares estropiaos por culpa las queimas nos montes. Del mesmu modu, sobre los bienes afectaos adoptaránse mididas cono obxectu d'axilizar los trámites alministrativos ya poder optar a una bonificación del 95% sobre la tasa d'obras. Todo el.lo, cona intención de normalizar las zonas afectadas no menor tiempu posible. 

            Al frente d'esta Oficina d'Atención a la Ciudadanía por Situación de Naturaleza Catastrófica ta'l técnicu del Conceyu D. Pablo Fernández Corral, baxo coordinación directa del Alcalde. Asina que, pa cualisquier duda en relación a la tramitación d'estas ayudas, veis poder ponete en contactu con cualisquiera d'el.los de manera indistinta.

Atentamente.

            L'ALCALDE,

Fmo. José Víctor Rodríguez Fernández

• Descarga nesti enl.laz el documentu orixinal (pdf. 846 Kb)