La Comisión de Fiestas de Cangas del Narcea decidíu, por unanimidá, faer actuaciones el día 14 de santamarina: "El desfile de peñas estiañu cai sábadu ya prevése muita afluencia de xente. La mocedá tien el sou espaciu polas cal.les ya los locales de la vil.la, pero pensando n'outru tipu de públicu al que-y gustan ambientes más distendíos, alcontrámonos con que, espuéis de la tirada de la nueite, nun habería opción pa el.los", explícanos Begoña Cueto, presidenta de COFECA. 

Espuéis de valorar varias opciones, el Conceyu Cangas, APESA, Xunta d'Hostelería del Conceyu, Sociedá d'Artesanos ya Federación de Peñas, entidades que forman parte de la comisión de fiestas, decidienon que la meyor opción yera traer una banda tributu. Optanon pola Poptelera, un tributu a la música pop rock de los años 70, 80 ya 90, que compartira escenariu cona Banda Gaudí.
Las opciones escoyidas pal restu de días son las siguientes: pal día 15, la nueite de los más nuevos, actuará La Última Legión, banda de L.lión que l'añu pasáu impactóu a las personas asistentes pola súa calidá ya bon fader no escenariu, ya La Misión, orquesta madrileña con una puesta n'escena espectacular. 

El día grande de las fiestas canguesas, el Día del Carme, vamos bail.lar al ritmu de los conocíos Waykas ya de la superorquesta New York.  El día 21, contaremos tamién con dúas grandes orquestas, Ibiza ya Televisión, ya, el día 22, Día de la Madalena, patrona de Cangas del Narcea, despidiremos las fiestas del 2018 acompañaos polas orquestas Malassia ya Vivians.
Los días próximos abriránse los plazos pal concursu de carteles ya'l Saluda infantil, amás de pa la presentación d'ufiertas pa la barra del bar, que, estiañu, inclúi un día más, el 14.